• ×

06:36 مساءً , الأربعاء 12 ديسمبر 2018

نموذج مستعمرة : النوع قائمة

نموذج مستعمرة : النوع قالب فيديو

قائمة

لو عندو فكك

زيادة حجم الخط مسح إنقاص حجم الخط
لا حول ولا قوة إلا بالله .. نطقت بها لا شعورياً مثنى وثلاث وأنا أتابع الخلاف الذي دار بين إدارتي (مستشفيين حكوميين) وهما إدارة مستشفي النو وإدارة مستشفي البقعة والذي للمرة الأولى أعرف أنه مستشفى أم درمان ولا أدري ما سر هذا الوله في تغيير الأسماء فمستشفى أم درمان( مما قمنا) ياهو ده إسمها .

كل فريق من المستشفيين يتنصل من أي تقصير قام به و (يدرع) القصة في الفريق الآخر ، القصة وبإختصار كالآتي :
• الساعة الثامنة صباحاً : جيئ بشخص وهو في غيبوبة كاملة إلى مستشفى النو بعد إصابته في حادث مروري .
• الساعة 12 (بعد 4 ساعات) كتب مدير مستشفى النو خطاب تحويل إلى للمريض لمستشفى البقعة يوصي فيه بعمل صورة مقكطعية للمريض مجانا لعدم وجود مرافقين معه حيث أن هذه الصورة غير متوفرة في مستشفى النو
• الساعة 4:10 عصراً ( بعد 4 ساعات تاااني) تحرك الإسعاف من مستشفى النو يحمل المريض
• وصل المريض بالإسعاف إلى مستشفي البقعة وهنالك قام المدير الطبي بالسؤال عن تقرير حالة المريض فإتضح أن المريض خرج من مستشفى النو دون تقرير وعند سؤال طبيب الإمتياز المرافق عن الحالة قال أنه لا يعلم عنها شيئاً .
• الساعة 8 مساء : (بعد أربعة ساعات تااااالت) : تم عمل صورة الأشعة للمريض (بعد أجاويد) !
تعليق :
عليكم الله ده إسمو كلام؟ المريض ده لو عندو (فكك) في كراعو مفروض يكون مات !!
من فوائد حدوث القصة الفوق دي (كان فيها فوائد) إنو عرفنا إنو علاج الحوادث (ما مجاني) وإنو لو الزول عمل حادث وما معاهو أهلو (أو مرافقين ليهو) دي مشكلة لأنو المستشفيات ما ح تقدر تعالجك وتقوم باللازم ، عشان اللازم ده عاوز قروش وإنتا جاي براك مافي زول ح يدفع ليك … يعني إذا حصل ليك حادث ورجلينك إتكسرو (مثلا) يجب أن تمشي بي رجلينك (المكسرات) ديل ذاااتم وتكلم أهلك عشان يمشوا معاك المستشفى …
• ليه ؟
• شنو ليه؟ إنتا هسه لو مشيت تطلب بت براااك أهلها بيدوك ليها؟
• لا طبعن .. إلا يكونوا معاي أهلي
• خلاس المستشفي كده .. كان مشيت ليهو براك عامل حادث ما بسعفك إلا يكونو معاك أهلك !!
• يعني قبل ما أعمل حادث أكلم أهلي أقول ليهم تعالو أنا ح أعمل حادث؟
• لا طبعن مااا تبالغ .. لكن بعد الحادث ما يحصل ومهما الضرر والإصابات الحصلت ليك لازم تمشي تكلم أهلك يرافقوك !
الحاجة التانية (العرفناها) إنو ولاية الخرطوم دي كووووولها فيها جهازين بتاعين أجهزة مقطعية لخدمة المواطنين ، يعني لو قلنا ولاية الخرطوم دي فيها عشرة مليون مواطن فالعشرة مليون قصاد الجهازين ديل بس !! (هسه دي ولاية عليكم الله يتحللوا فيها) !!
الحاجة التالته عرفنا مما دار في الصحف والفضائيات بشأن هذا الأمر بأن المريض المذكورإحتمال كبير يكون قد حدث له قطع بالنخاع الشوكي وذلك من طريقة حمله وتحريكه والعبدلله يضيف لذلك (الإسعاف ذاااتو) و (نقالات الحديد) المستعملة في معظم مستشفياتنا فمعظم عربات الإسعاف (فاضية) لا فرق بينها وبين (بكاسي السوق الشعبي) التي ينقل عليها (الخضار) أما (نقالات الحديد) فلو كنتا محظوظ وطلعتا من حادث ممكن (يجيك تيتانوس) !
كسرة :
جهازين أشعة مقطعية (بس) في ولاية فيها ستين ألف حرامي (أنظر تقرير النائب العام) … !

• كسرة تصريح النائب العام : (لا حماية لفاسد ولا كبير على القانون) … الحصل في ملف هيثرو شنوووو (و+و) !
•كسرة جديدة لنج :
أخبار كتب فيتنام يا وزير المالية ووزيرة التربية والتعليم شنو(و+و+و+و+و+و+و) …
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+ (وووووووووووو)+(وووووووووووو)

• كسرة ثابتة (جديدة)

أخبار تنفيذ توجيهات السيد الرئيس بخصوص ملف خط هيثرو شنو (وووووووووووو)+ (وووووووووووو)+ (وووووووووووو)+وووووووووووو)+(وووووووووووو)+و

بواسطة : الفاتح جبرا
 0  0  215
التعليقات ( 0 )

جديد الأخبار

على العربى الف مبروك للزعيم وعشاق الزعيم.............ربنا يسامحكم

جديد المقالات

أحمد محمد الحاج....رحيق رياضي :: بعبع الفيفا □...


بواسطة : بابكر سلك

في السلك بابكر سلك انت البطل يا منجد *الشغل...


بواسطة : هيثم كابو

العتب مرفوع هيثم كابو ليل الشتاء طويل ..! *...


بواسطة : امير عوض

*نبض الصفوة* *امير عوض* *نصف مليون دولار* لعل...


حائط صد محمود الدرديري اوسونو ادب...



حالة تحدث كلما تجلى الزعيم وفرهد ونفث عبيره...


بواسطة : مـــقــالات

عمود نص الكباية : معاوية قمر الشريف شعرها قمل...


بواسطة : بابكر سلك

أميرة محمد في السلك..........بابكر سلك ايها...


بواسطة : هيثم كابو

Aljaily Ali ‏٢٢‏ ساعة ضد التيار هيثم كابو...


القوالب التكميلية للمقالات

جميع الأوقات بتوقيت جرينتش +3 ساعات. الوقت الآن هو 06:36 مساءً الأربعاء 12 ديسمبر 2018.