• ×

03:49 مساءً , السبت 15 ديسمبر 2018

نموذج مستعمرة : النوع قائمة

نموذج مستعمرة : النوع قالب فيديو

قائمة

المريخ بخلي المجنون يهبش والعاقل يطقع

زيادة حجم الخط مسح إنقاص حجم الخط
في السلك
بابكرسلك
بالهاون يامجنون:


> المريخ عالم جميل
> المريخ بخلي المجنون يهبش والعاقل يطقع
> المريخ بنسيك كل المآسي
> لكن مابتقدر تنساهو
> حد يقدر ينسي نفسو!
> ممكن تكون ولهان بالمريخ
> تلقي جاز في الطرمبة
> تلقي قروش في الصراف
> تلقي وظيفة لابنك الخريج السايق الركشة
> ممكن تلقي الدولار بنص جنيه
> قلت ليكم المريخ بخلي العاقل يطقع
> ممكن تتأمل في المريخ جواك وانت راقد داير تنوم
> باعوضة ماتعتر ليك
> تنوم عااادي وساي كمان
> وانت بتمارس في عشقك للمريخ وماشي علي الاستاد
> ممكن تلقي جزار بكورك بالمكرفون
> كيلو الضان بجنيه
> كيلو العجالي بنص جنيه
> كيلو البقر بربع جنيه
> والكبدة مجاني
> ده المريخ
> ممكن تذوب في المريخ وانت واقف للمواصلات
> فجأة تسمع نميري في الراديو
> ماتمشوا بعيد
> نميري احمد سعيد
> من خلال نفرة الرياضية
> المريخ بجنن العاقل ويعقل المجنون
> اسي قدورة المجنون ده ولدوهو مجنون يعني؟
> موش كان عاقل؟
> الجننو شنو باقي ليكم ؟
> لاتهاون بل بالهاون
> عبارة مجنونة يطلقها مجنون المريخ قدورة دوما
> اليوم نستلفها منه لنرفعها شعارا للمعركة
> لاتهاون يامجنون
> بل بالهاون ياقدورة
> الجماهير هي زاد النصر الكبير
> في مباراة اتحاد الجزائر شكلت غياباتكم فراغات قبيحة علي المدرجات
> برغم ان المدرجات ازدانت بالشفوت الذين شرفوها
> ولكن البحر مابيابه الزيادة
> اليوم نتوقع ارتال الشفوت زاحفه صوب الاستاد من عصرا بدري
> وياحلاتنا لو جينا نلبس الوان الشعار
> لنشعلها نار
> اليوم هو يوم اللاءات التلاتة
> لا للغياب
> واذا جيت
> لا للفرجة
> ولا للخسارة اطلاقا
> المريخ بمن حضر
> والاولاد جاهزين موية ونور
> وزادهم في حناجرنا
> ان اطلقنا حناجرنا دعما لهم انتصروا انتصارا يؤهلنا بفضل الله من الليلة
> وان بخلنا بحناجرنا عليهم
> سيقاتلوا ولكن الايد الواحدة مابتصفق
> يبقي لاتهاون زي ماقال قدورة
> تجي وتستعمل حنجرتك هاون
> ايها الناس
> لاجل المريخ نضع ايادينا فوق ايادي الجميع
> والبسحب ايدو بكون كشف نفسو
> نريد ان نمضي بعيدا في بطولة افريقيا
> نريد ان نتحسس درب العودة لمنصات التتويج الافريقية
> طبعا درب العودة لمنصات افريقيا ده بالنسبة للهلالاب زي درب الجمل
> لاعارفنوا وين
> ولافارزين العطشان وين والرويان وين
> مشوهوا عاد متين؟؟؟
> ده شعرا ناس فطومة ماعندهم ليهو رقبة
> ايها الناس
> نجي كلنا لي مريخ بهمنا
> المرحلة تتطلب ذلك
> ايها الناس
> اكتب قبل لقاء الهلال وزنزبار
> اتمني ان تكون النتيجة قد اسعدت الشعب السوداني والله ادانا الفي مرادنا
> ليكمل ربنا فرحة الشعب السوداني اليوم باعلان تأهل الزعيم من هنا
> ياربنا
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت ياوالينا
> الليلة شمارنا لي ربنا الخالقنا وبحمينا
> الاحيانا وبميتنا وتاني بحيينا
> ياربنا
> نحن شعب زمنا كلو في صفنا
> من جاز لي صراف لي صف عيش نجانجا
> ياربنا وياربنا
> بنحبك كتير وعارفين انك بتحبنا
> لو ماكده بالحاصل ده زمااااااان عزرائيل كان قبض هنا وقبض هناك وروحنا اصلها في السهله قاعده هنا

سلك كهربا
ننساك كيف والكلب قال وين حنهرب منو وكيف
والي لقاء
سلك

بواسطة : بابكر سلك
 0  0  316
التعليقات ( 0 )

جديد الأخبار

قال مدثر خيري في حديثه لإذاعة هلا 96 خلال برنامج زمن اضافي الذي يقجمه الزميل حسن..

جديد المقالات


بواسطة : بابكر سلك

في السلك بابكر سلك الشوالي والشوالات...


بواسطة : مـــقــالات

صيحة موسى مصطفى فشل مخطط تدمير المريخ...


بواسطة : جعفر سليمان

اللعب على الورق جعفر سليمان الزلفاني...


بواسطة : اسماعيل حسن

وكفى إسماعيل حسن إلى مجلس المريخ *...


حائط صد محمود الدرديرى الخبير علي اسد...


بواسطة : الفاتح جبرا

تكررت حوادث الطيران لدينا بصورة تنافس حوادث...


بواسطة : الفاتح جبرا

في خضم ما وصلت إليه الدولة السودانية من إنهيار...


بواسطة : حسن حمد

حسن محمد حمد حمد.............لمن تقرع الاجراس؟...


في الهدف ********** سيدي الرئيس انكم تقتلون...


القوالب التكميلية للمقالات

جميع الأوقات بتوقيت جرينتش +3 ساعات. الوقت الآن هو 03:49 مساءً السبت 15 ديسمبر 2018.