في

جديد الأخبار
جديد المقالات
جديد الفيديو

نصر يا رب

المقالات
مزمل ابو القاسم
كبد الحقيقة:تيمك صاح يا صلاح.. فرسان شندي صادوا الأسد وقلبوا البلد
كبد الحقيقة:تيمك صاح يا صلاح.. فرسان شندي صادوا الأسد وقلبوا البلد
05-14-2012 02:29 PM

كبد الحقيقة:
مزمل ابوالقاسم
تيمك صاح يا صلاح.. فرسان شندي صادوا الأسد وقلبوا البلد

الأهلي صال وذلل المحال.. الأهلي نار.. أحرج الكبار!

نفس المكان يشهدلنا.. يوم فوّح البارود عبق.. نفس المكان يشهد زمان.. الباشا يوم غلط اتحرق

نحن العركة أنيابا وقرونها.. ونحن القاسية عنها تسألونا.. نحن الما بنفز كان قطعونا.. ونحن الما بنخيب ظن بنونة

* اليوم لا هلال ولا مريخ.. الحصة إنجاز وتاريخ!

* لأهلي صال.. وذلل المحال.

* الأهلي نار.. أحرج الكبار!

* في شندي الجميلة المستحيلات ممكنة، وفي الخرطوم الحزينة الممكنات مستحيلة!

* أتى الأهلي من بعيد.. وخلى الدنيا عيد!

* سقط المريخ، تواضع الهلال، ضاع الأمل.. والأهلي اكتمل!

* أهلي شندي.. أهلي السودان.. ظهر وبان!

* آلام خروج القمة.. يغسلها أهلي شندي بكل همة.

* في دار جعل.. الفرح اكتمل.. وغطت الدموع المقل!

* كان مهمته الأصعب، وهمته الأعلى.

* كان مطالباً بأن يفوز بثلاثة أهداف نظيفة ليغطي الفارق ويمنح نفسه فرصة عبور.

* انتهى الشوط الأول بالتعادل السلبي فما فترت منه همة ولا ضعف عنده طموح.

* غطى الفارق في شوط واحد، وأسقط الأسد التنزاني بالترجيحية.

* كل الأحلام تبعثرت والأحلام تبخرت، إلا في دار جعل!

* في شندي الجميلة الورود اتفتحت والآمال اتحققت والأفراح اتمخطرت!

* لم يقلب الأهلي الطاولة فحسب، بل (قلب البلد)!

* لم يتخيل أكثر المتفائلين وأوفر المتحمسين أن يفوز الأهلي ويغطي الفارق ويعبر الأسد التنزاني.

* واجه الأسد (نمراً) لا يرحم فرائسه!

* (ده مو نمر الشدر الحاضن فروعو مقيّل.. ده النمر البضاير الصف محل ما يميل.. كل ما أقول شُكر ألقاهو فيهو قليّل)!

* في شندي الجميلة زغردت الحرائر، وانتشى النيل، وتمايل النخيل، وازدهت الجروف.. من الجزيرة النية لي ساردية!

* يا جمال النصر في شندي، ويا لروعتك يا أهلي.

* (دمدم رعد فوق خور عروس.. والقبلي في العوتيب برق.. أحفاد بنونة اتباشروا.. ساعة نحاس أبواتنا دق.. يا جابوا رضوة ناس سعاد.. يا راحوا في السيل الدفق.. الركزة ما شاحدنها.. والسترة أصلاً لينا حق.. نفس المكان يشهدلنا.. يوم فوّح البارود عبق.. نفس المكان يشهد زمان.. الباشا يوم غلط اتحرق.. نفس المكان فيهو الحسان.. بي عزة فضلن الغرق.. الليلة في نفس المكان اتنادوا فرسان السبق.. حرسوا الجرارق عزهم.. صانوهو لا راح لا اتسرق.. لو لانو يحردن البنات.. كان تروا يلبسن الطرق.. ربحوا الأربابيب الدواس.. جابوهو نصراً مستحق.. ذكرني صحن الأزهري.. لا فيهو شق لا فيهو طق.. جابوهو حمرة عين عديل.. جابوهو بالدم والعرق)!

* بشراك يا عبد المنعم!

* بالأمس سالت دموع الفرح، وانداحت السعادة من دار، لتشمل أرجاء السودان.

* قلناها سابقاً ونكررها حالياً: ما فعله الأرسنال استعصى على المريخ والهلال!

* الأهلي يصنع التاريخ!

* الأهلي يقهر المستحيل!

* الأهلي يزردي الصعاب.

* الأهلي قوة.. ومروة.. وفتوة.

* الأرسنال هيبة وجمال.

* صعد للممتاز عنوةً واقتداراً برغم ضراوة الحرب التي عطلت انطلاقته أربع سنوات كرهاً في الأرباب.

* وفي أول موسم بالممتاز فات الكبار والقدرو!

* نال المركز الرابع، وقهر الهلال، وأرهق المريخ، ونال شرف تمثيل السودان خارجياً، وانتصر في أول مشاركة إفريقية له( رايح جاي)، وقهر المستحيل بإذلال سيمبا التنزاني والصعود إلى دور الستة عشر مكرر!

* مين زيك يا أهلي؟

* ومين يشبهك يا جميل؟

* آخر خبر: القمة تأخرت.. وكتيبة النمور اتقدمت!


النجاح ليس صدفة

* تحية قوية للفرقة الشنداوية!

* إرادة التي لا تعرف الاستكانة، وطموح لا يعترف بالمستحيل.

* النجاح ليس صدفة.. وما فعله أهلي شندي لم يتحقق خبط عشواء.

* التحية لمن أخرج هذا المارد الضخم من القمقم.

* هناك رجل عظيم (والعظمة لله) صنع ربيع الأهلي، ووقف وراء كل إنجازات الأرسنال.

* بالإنابة عن كل عشاق الكرة الشنداوية، وعن كل محبي النجاح في بلد النيل والنخيل نقول للأرباب حفيد الأرابيب شكراً لك، لأنك صنعت النجاح، وعلمت أبناءك كيف يقهرون المستحيل.

* شكراً لك لأنك بذلت وما قصرت، ودفعت ما تبرمت، وأبدعت وما فشلت.

* شكراً لك لأنك زرعت في نفوس أبناء الأهلي الطموح الوثاب، والرغبة في التفوق، والقدرة على قهر الصعاب.

* شكراً لك لأنك قدمت للكرة السودانية أجمل هدية ومنحتها فريقاً يشرفها، ويرفع رايتها، ويجدد مجدها ويمسح أحزانها.

* شكراً لك لأنك برهنت أنك مبدع بالفطرة، ومعجون بماء التفوق.

* شكراً لك لأنك أهديتنا أقوى المحترفين، وجلبت أمهر اللاعبين وأفضل المدربين.

* شكراً لك لأنك أحسنت إعداد أبنائك لملاحم القارة السمراء، وأقمت لهم أفضل المعسكرات في تونس الخضراء.

* شكراً لك أنك أهديت الأهلي مدرب عملاق اسمه محمد الكوكي، ومجموعة من أميز المقاتلين وأفضل المحترفين.

* شكراً لك لأنك رفضت اليأس، ونزلت بين الشوطين لتخاطب أبناءك اللاعبين وتبث فيهم الحماس والرغبة في الفوز وأهديتهم تميمة النصر الجميل.

* وقد كان.. سرت كلماتك فيهم سريان النار في الهشيم، وحولتهم إلى فرسان يأكلون النار.

* شكراً لك نقولها من الأعماق بالإنابة عمن عرضوا مساء أمس في قلب إستاد شندي، ونقلوا الفرحة لعموم ربوع الوطن الجميل.

* النصر البديع الذي تحقق في شندي بالأمس مولود شرعي لرجل اسمه الأرباب صلاح الدين أحمد إدريس، صنع ربيع الأهلي، وحوله من فريق عادي إلى مارد يشق الصفوف ويقهر الألوف ويزدري المستحيل.

* الشكر من بعد ذلك لفرسان الأهلي الأشاوس، بدءاً بقائد الفرسان النور التيجاني، وحارس العرين الدعيع، وصدام الهمام، وزكريا، وباسيرو، وحمودة، وفريد عصره فريد، وعليو، وفرانسيس ونادر، ومنتصر، وعروة، وفارس، والنعيم، ويعقوبو، ووليد حمدان، ومنير الخير، والنعيم، ومهيد الأرباب، وكل فرسان الأهلي.

* كانت ليلة من ألف ليلة وليلة، غنى فيها البشيرة، والسوط دور في دايرة السنتر!

* العرضة صقرية، والمحلمة تاريخية!

* والعريس أرباب.. حاشاهو ما كضاب!

* والتحية لكل لقادة الاتحاد المحلي وكل رجالات أهلي شندي، بدءاً من الرمز الرياضي الخالد خضر أبو السعود، مروراً بابن عمي سعادة العقيد حسن العقيد رئيس النادي، والصابر الصامد هاشم أحمدونا ورفاقه وكل أعضاء مجلس إدارة النادي وجمهوره العظيم، وكل محبي الكرة في دار جعل الأبية.

* كنت حريصاً على حضور الملحمة من داخل الإستاد، لكن ظروف سفري فجر اليوم إلى مدني لحضور جلسة محكمة في قضية نشر أعاقني عن الحضور، وفوت علي فرصة مشاركة أهلي أجمل فرحة.

* الفرحة عامة والنية زاملة سيدها!

نحن بنحب شندي موت

* بمناسبة فوز الأهلي التاريخي على سيمبا التنزاني أعيد نشر القصيدة البديعة التي جادت بها قريحة شاعر شندي الفذ عبد المنعم محمد أحمد وقال فيها:

* (نحن بنحب شندي موت.. هامة المجد وبريقو.. صفحة من تاريخ مجيدة.. تربة الباشا وحريقو.. الارابيب ضو ظلاما.. وفزعة الهداهو ضيقو.. والمسافر في خلاهو.. دلتو وعوجت طريقو.. ضيف تلوت اليل يجيها.. عشتو وبلتلو ريقو.. الغريب حضنت جناهو.. وعزتو وصبحت فريقو).

* (نحن بنريد شندي فوق.. الفوق خديد الدتيا شامة.. فوق جبينا شندينا غرة.. قودو يالصلاح زماما.. يا رجال اهل الله هبوا.. انتو خاتين الملامة.. شندي فوق بلد الاشاوس.. فيها حجياب نشامي.. فيها سادات الحجازة

فيها ربايين يتامى.. فيها شيخ الخلفاء جعفر.. وستي كلتوم للعشامى.. فيها ساداتي المراغنة.. فوق ذرى السادات علامة.

* (نحن بنحب شندي موت.. أي حاجة هناك بتعجب.. كل ما فيك ياسلام.. شندي صاغوها الافاضل.. شندي سووها الكرام.. شندي بذرة فضل اصلا.. قايمة في طين احترام.. نحن بنريدك حقيقي.. ماهو داب ونسة وكلام.. نحن بنحب الخضر.. التنافس ما خصام.. نحن بنريد المؤسسة.. نحن بنحب نيل عصام).

* (يا سلام يا اهلي شندي.. أنقياء وصافين سريرة.. يا سلام يا ذكرياتنا.. البتفرح والمريرة.. باقية عظمة ابو السعود.. خالدة ضحكة ابو شعيرة.. يا سلام احمدتي أسرع.. ادرك الركعة الاخيرة.. لسه هيبة ود جبور.. تسند النفس الكسيرة)!

* (يا سلام يا اهلي شندى.. كير وشمس الدين وماجد.. المروة الفي الدخيري.. الشهامة الفي مجاهد.. حرة الكوتش ورفاقتو.. البسد الفرقة عابد.. مين بيشبه احمدونا.. براهو شايل الشيلة صامد.. اهلي شندي براهو دنيا.. وبملى عينك اي واحد)!

* ( كل ما فيك فيهو راحة.. كان نسيمات كان عجاج.. بردك الدافي الحنين.. حر هجيرك لابسو تاج.. نفسي اهرول حافي حلق.. من قريش حدي السياج.. حزقيال ادي التحية.. وللمحطة حنيني ماج.. انزل السوق الكبير.. بالي رايق وشوقي هاج.. اغشى قهوة بابو فاتح.. اشرب الشاى بي مزاج.. نكتة من ود الحدية.. ضحكة الاعماق علاج.. جولة في سوق الخضار.. ونسة في دكان سراج).

* (شندي ابلغ ما تكون.. صورة لى نبل العبادة.. صورة للدين السماحة.. والتآلف فيها عادة.. الدواخل عامرة ديمة.. بالترانيم والشهادة.. في الاعالي المجد لله.. والمسرة تسود سيادة.. يا سلام لمن تشوفم.. المغاوير والنقادة.. رمزي قادح حاج محمد.. ولطفي بدفع بالزيادة.. في فريق الصافي لمة.. البكفي نبيه قلادة.. لاقت الضيفان نسيمة.. وعلقو الصيوان ولادا. ابهى صورة من التكافل.. رولا بتساعد فى غادة.. آمنة ساقت وصفة بدري.. قالو ماشابا العيادة.. عازة رسلت العصيدة.. المغيرب لى سعادة)!

* (اقصى ما بي من اماني.. العصر اعمل مرور.. قدلة في الديم العصاري.. اغشى تمرين النسور.. اسمع الريّس يوصى.. الزعيم دايما حضور.. من بعيد حياني تمبك.. الفتى الصلب الجسور.. جاري مشغول بالو ديمة.. بالمعسكر والكجور.. لو صرخ ملين منشز.. بس تقول غرد سرور.. حجة بين الرومي و ادريس.. حجة في حق الفطور.. والبيوت الغبشة ضاحكة.. ضحكة ما لقتا القصور.. ناس تدوس الدنيا بهجة... بتقدر الايام تجور).

* (شندي اكبر من حروفي.. وابهي من كل الدفاتر.. شندي ابلغ من قصيدة.. وازكى من نزف المحابر.. التحيات للخواجة.. اغنى ماضي وابهى حاضر.. درة الزمن الفريدة.. فلتة واحدة وفنو نادر.. كان بحاضر في الميادين.. هسه في الطلاب بحضار.. الخواجة من العجايب.. تامنا وفي ظني اخر.. شندي ما في شبيهة ليها.. ودا البخلي الزول يفاخر.. خاصة نحن العشنا فيها.. في رحاب ملك المنابر.. نحمد الله عشنا عصرو.. امة تحمل اسم عامر.. شندي كان عرابا عامر.. التحيات النواضر.. السلام استاذنا عامر)!


شمعة وسط الظلام


* خطفت شندي الأضواء من الخرطوم.

* ساد الوجع، وتمدد الحزن بسقوط الثلاثي!

* النتيجة العامة: فرحة وسط ثلاث انكسارات.

* وزغرودة بين ثلاث دمعات.

* وشمعة وحيدة في عز الظلام.

* مليون تحية لفارس الكرة الشنداوية.

* ومليار سلام للأهلي الهمام.

* في دار جعل (تاني ما تقول انتهينا.. نحن يا دوب انتهينا)!

* (نحن عز الدنيا ديّ.. نحن عز الدنيا بينا)!

* دموع الخرطوم تجف في شندي.

* وأحزان عطبرة تزول في دار جعل.

* انتصار الأهلي المعلوم.. يمسح آلام عطبرة والخرطوم.

* الأهلي ظفر وعبر!

* (النار التي أشعلها المك نمر ستظل متقدة، تنذر كل طامع بأنه سيكون حطبها ووقودها، مزيداً من الانتصارات، ومزيداً من اللهب) أو كما قال الحبيب حسام عامر جمال الدين!

* وعلى لسان الحبيب فاروق أبو حوة: (نمور دار جعل الناقصة تب تموها.. شندي الفخار الليلة تب جموها.. جابوهو النصر والفكة تب صموها، غنوهو الصعود والفرحة تب تموها)!

* ضرب السوط بشح.. إن ما قدرو زح!

* الأهلي الحر.. الفعلو يسُر.. في الزنقة أم لوم قدام باينين!

* (نحن العركة أنيابا وقرونها، ونحن القاسية عنها تسألونا، نحن الما بنفز كان قطعونا، ونحن الما بنخيب ظن بنونة).. "عبد المنعم محمد أحمد".

* آخر خبر: تيمك صاااااااااح يا صلاح!

تعليقات تعليقات : 1 | إهداء إهداء : 0 | زيارات زيارات : 1353 | أضيف في : 05-14-2012 02:29 PM | شارك :


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook
  • أضف محتوى في twitter


التعليقات
1083 Turkey "عمر الفاروق" تاريخ التعليق : 05-14-2012 03:39 PM
ودا الفرق ياستاذ انو الاهلى المسكين دا وتاريخو المحدود عندو لعيبة بيقلبو الطاولة ويرجعوا عقارب الزمن ويصنعوا المستحيل وفى المريخ لاعب تاززززززززماعارف اسمو شنو بباسى الكورة فى اخر خط لهجوم مازيمبى وقال لاعب محترف فى القمة بشعار المريخ السودانى والله عاوزة تفك مننا عديييييل كدا اعوذ بالله السميع العليم من الكفر والفقر وقهر الرجال.فرق والله يوم تظهرفى شندى معادن الرجولةوالفحولة والاصرار والعزيمة والعنوة والفتوة والاقتدار والثقة فى النفس والمسئولية والهدف الواضح ربنا بيكتب النصر فى الجباه ...........عشان كدا فاز الاهلى شندى وحير الجميع وخسر المريخ وكان مطلوب من المريخ اقل من المطلوب من اهل شندى هدفين بس .....حسبنا الله ونعم الوكيل ابراهومة اخد فرصة و ما نافع عاوزين جبرة اماريكاردو يكمل الكونفدرالية ويرحل لو ماحقق بطولة ,,,,ساكوها واديكو كان دا لعبهم اخير عدمهم نركز مع موتيابا وكلتشى وبقية الموجودين لو حيتعلموا ويتحسنوا والا فلايستحقون هذا الشعار....وخلينا نشوف لينا شغلة تانية


مزمل ابوالقاسم
مزمل ابوالقاسم

تقييم
10.00/10 (1 صوت)

جميع الحقوق محفوظة لشبكة ومنتديات الزعيم