• ×

02:31 صباحًا , الأحد 19 نوفمبر 2017

نموذج مستعمرة : النوع قائمة

نموذج مستعمرة : النوع قالب فيديو

قائمة

القصيدة التي ابكت كل سوداني عاشق تراب الحبوبة !!!!

زيادة حجم الخط مسح إنقاص حجم الخط
 

القصــيدة التي يقال ان شاعرها يدعي
محمد أحمد إبراهيم الحسين من عطبرة
وكتبها في المرحلة المتوسطة ..
... كدي اقروها للنهاية وامسكوا دموعكم
وفي يوم من الأيــام
فتحت من النــوم
ولقيتني سوداني
وكان عمري خمسة سنين
الدنيا كانت حــب
وكل البـيوت بيتـنا
وأخواني كانو كــتار
ما من أبوي وأمي
إلا الجــميع أخوان
رابطــنا كان عشرة
ما شرط يـكون من دم
نتغدى في بيتــنا
ونفطر محل نتــلم
والناس دي بتجيــنا
في كل يوم جمـعة
بس التقول العــيد
وأنا كنت وأصـحابي
نلعب مع القمرا
نتجارى نتســاكك
نمشيلا حبــوبة
تهرج علينا شــديد
طولتو يا الحــبان
أنا ياخي راجــياكن
تحكيلنا حدوتة
فاطنة وحكاية الغــول
وامحمد الفارس
وأنا كنت ما معاهـن
كان همي أتعشى
بس للأسف نمـت
صحوني للكــتاب
أنا قلت ما ماشي
دقوني بالشبشب
وحبــوبة حجزتني
قالت بتقـنع أبوي
شن فايدة الكــتاب
وأنا بي وراها أقــول
وماسك طرف تــوبا
نضمك سمح بالحــيل
شن فايدة الكــتاب
خليني قاعد ســاي
أمشيلكم الدكــان
ولو ضيف غشاكم يــوم
أنا بفتح الأبواب
أبوي ضحك فيني
قال لي بإستـهتار
ما ليك عمار أصـلك
ولمن أبوي فرتــق
قعدنا نتونــس
حبوبتي قالــت لي
عاينلي يا المطموس
أحسن تفوت تقرأ
ولمن تعاود لي
تلقاني راجياكا
بديك قروش وبلح
وأحكيلك الحكوات
وأنا قمت صدقت
ومشيت علي الكتاب
ولمن رجعت البيت
جدعتها الشنطة
بالحيطة فنيتها
وجرينا نلعب ساي
شدت لعبناها
ولعبنا بالعدة
وأنا فت جبت خــدار
سوينا ملحاتــنا
ولمن تعبــنا خلاص
لملمنا نعلاتنا
بس الشمس غابــت
وطلعتلنا القمــرا
قال أحمد المــبروك
نلعب شلــيل آناس
وفطومة بتوافــق
وأنا قلت ليهو خــلاص
ولعبنا في القــمرا
ورجعنا لبيوتــنا
وحبوبة تهرج ســاي
طولتو يا الحــبان
أنا كنت راجــياكن
تحكيلنا حدوتة
فاطنة وحكاية الغول
وأمحمد الفارس
وأنا كنت ما معاهن
كان همي أتعشى
بس للأسف نمت
ولمن صحيت تاني
ما لقيتها حبوبة
لكن لقيت الحوش
مليان حريم ببكن
أنا قمت حتى بكيت
وما عارف البحصل
ومشيت سألت أبوي
ولقيت دموعو تصب
حبوبة فاتت وين ؟
قال لي : ما تـســأل
طلعت قريب بي جــاي
لكن بتتأخر
وكت ماشي للكــتاب
بس شفت في الصــيوان
أستاذنا عبدالله
كان في الوسـط قاعــد
وكان حصـتو الأولى
أنا قم فرحت جريــت
شان أحكي لي فاطــنة
لاقتني فرحــانة
قالتلي ماف كــتاب
قالولنا في إجــازة
ولعبنا في بيتــهم
ولمن رجعت البــيت
ما لقيتا حبــوبة
لكن لقيت توبا
في شجرة الليــمون
أنا قمت لميتو
لقيت بلح وقروش
في طرفو مربوطــة
لكني ما داير
لا قروش ولا غيرو
وقعدت أبكي شــديد
نادولي حــبوبة
وبكيت كمان وكــمان
وأنا نمت في توبا
لما الشمس طلــعت
عاينت فوق الضــل
ما لقيتا حــبوبة
فتشت أوضتــنا
ما لقيتا حــبوبة
وأنا كت بناديها
حبوبة .. حبوووبااا
أنا جبت ليك الـتوب
ولقيت بلح فيــهو
لكني ما أكلتــو
لمن تضوقيــهو
وتديني إنتي براك
حبــوبااااا .. حبـــوبا
ردت علي أمي
من جوه للمطــبخ
حبوبة في مشــوار
أنا قمت طنطنت
ياخ من أمس مشوار ؟!!
فتشت ناس جدي
وناس حاجة خادم الله
ومشيتلها الجامع
لقيت حريم في صف
لابسات لبس أبيض
عاينت في وشوشن
ما لقيتا حبوبة
بس شفت في عيونن
دمعا يكب جاري
ضمني ليهن زيييين
قالن لي يا المبروك
حبوبة في مشوار
وما أظن تعود هسي
بس إنت أدعيلها
وأقرا ليها كتير
الفاتحة تنجيها
وأنا حتى قمت بكيت
وسألتهن بالدور
كيفن ألاقيها ؟
قالنلي يا المبروك
حبوبــتك السمــحة
عند الله ناداها
لميــت علي الــتوب
لفيتو في جســمي
قبلت للقــبلة
ورفعت يديـني
يا الله يا ربي
حبوبتي ناديـتها
وأنا هسي ماش ليـها
يا الله ناديني
أنا داير ألاقيـها
لو مرة تاني خلاص
بس تحكي لي قــصة
وأديها حاجـاتة
توبا وقريشــاتة
من بدري لاماهــن
حاجاتة ما كمــلن
الزيت هناك مقـفول
والشبشب الزيــزي
وكمان معاو سبـحة
وحتى الخمار قاعد
يا الله ترجع لي
من تاني حـكواتة
ومعاها ترجــع لي
فرحــة بنيــاتا
ونفطر مع الجــيران
والقهوة في بيــتنا
يارب ترجــع لي
يا الله ناديــــها.............
بواسطة : admin
 0  0  194
التعليقات ( 0 )

جديد الأخبار

الاهلي مدني يمنع قناة الملاعب ويسمح للهلال بنقل المباراة رفض الاهلي مدني..

القوالب التكميلية للأخبار