• ×

06:48 مساءً , الخميس 15 نوفمبر 2018

نموذج مستعمرة : النوع قائمة

نموذج مستعمرة : النوع قالب فيديو

قائمة

طارق جبريل : و حكاية كريم كدي فشان نحلقبوا.. دخلت يا الحبان علي ساونة السواد دي

زيادة حجم الخط مسح إنقاص حجم الخط
 
image

Tarig Jibreel
.
حنين معاد..
ـــــــــــــــــــــــــــ

الحبيبين كيفنكم
باقي شغلانية الصحافة دي مرات ترميك في حتات كدي.. أصلها تودر ضُمة ضُمة
شركة جيليت ألت امواس الحلاقة ديك قالت سوتلها منتوج جديد ودايري تعرضه علي الصحفيين
أها يا الحبان قامت سوتلنا رحلة لي مراكش في فندق باقيلي تسعين نجمة.. وصلنا يا الزينين جارين شنطنا...دخلنا الفندق..
شويتين جوا الخواويج ديل يعوجوا في الكلام من هني لا هني
والميزات ألت الموس الجديدي وكيفن فيها تلاتة أمواس فِرِد مرة.. ونحن قاعدين مبحلقين عيونا... انتهوا من نضميهم دة وادونا كل واحد مكنة وقالولنا لامن تدخلوا وتمشوا علي ((الساونا)) ومن بعدها ((الجاكوزي))
استعملوا الامواس دي للتجربة.. وباكر ان شاء الله نوريكم الميزات.. شلت الماكينة ألتي وادوني معاها بشكير كدي علي العراقي وليهو (تِكَة) في نصه كدي.. يسموهو (الروب)
ومعاهو كريم كدي فشان نحلقبوا.. دخلت يا الحبان علي ساونة السواد دي.. أصلو الحر دة قرب ياخد رويحتي.. وقلت في نفسي: هو الحر دة أتاريهو ياها الساونة....إن بقى كدي سودان الجن اتاريهو ساونة ربانية حقو نبيعا للأوربيين..
شويتين يا الحبان قلت كدي دخلت علي النصيبة الاسمها ((الجاكوزي)) دي.. غتستلي في حوضا يلمع علي الفضيي كدي وكله مرايات وجنمبو جرايد فشان اتسلابن
قلت كدي طمست في حوض الجن دة وبقيت اقرأ في الجرايد... شويتين الحوض اتملا موييي
وبقى يبغبغ فوقي علي بغبيغ حَلَة (اللوبي عفن) قبل الآذان بي ساعتين في رمضان.. وأصلي قولت الخرابين ديل لا يبقى دايرين يسلقوني.. وحاتكم قلعت عيوني علي القعونجي الشايفالا ضبانة ومنتظري تاكلا ... والبغابيغ واقعات فوقي علي لا عرفته هوايا جايي من لااااتحت لا عرفت بطني مغلتة علي...
أصلو جلدي دة كله اتلبش... والموييي تشيل وتبغبغ فيني.. وقلبي بقى يدق علي الواحد وكتين أول مرة داير يقول للجكس: أنا قاعحبك
وبقيت استغفر واسبح.. ود مغستك يا ود بت بغداد... يا ربي تنجدني..
شوووووووييي رفعت رجلي اليمين بي شويي كدي لقيتها بقت تراري... باقيلي نزلت الخبوب الفيها كله من البغبيغ... يا حليلك يا عوض كريمة إن بقوا ختوك في الخرابة دة وحات نضري القمل الفي لستك لباسك علي يطفح فوق الخرابة دة.. وصوف رجليك العلي حقن الدرب داك علي يبقى أملس علي المطوطي... وأصلو انكان لي ضلافينك وشقوق كرعيك علي عراميس الطوب قبل البياض..
شويتين اطمأنيت وكتين البغبيغ بقى شويي شويي يقيف علي الماسورة وكتين تكون عدماني اسم المويياي تسوي في الشخخخخخخخخخخ... وكتين وقف البغبيغ جاني صابونا ورغوة مارقات من وين ماني فارزن... وبقيت اتمشك.. واصلها الليفي ناعمي وعاملي زي حلاوة لكوم .. ماها زي الليف العندنا داك الشكله علي الموز داك وكله بذر من جوة...
اتمشكت زيييييين واخدتلي دش تاني ولقيت نفسي بقيت اراري... وحات الله ان بقيت جيت الامتداد الوكت داك ابوي ما يعرفني في الدرابزين أليلنا... أها دخلت في عراقي الخواجات دة ((الروب)) وشيلتة موس الحلاقي دي ومشيتلي علي حوضا
سمح كدي يمين استخسرت أحلق فوقه وحات نضري زي سرويس الكباب أليل السماية.. يمين أن بقيت ملحتلك فوقو قراصي بي ملاحا أخدر خسارة برضو فيهو
وقول كدي مسحت كريم الحلاقي في احناكي بالله كبسن البرد..... وكريم الجن دة اتاريهو يبرد الجلد... طلعت موس الحلاقي وبديت احلق..
بالله الموس دي تنزلق في جلدي علي النسوان البيرقصن في الجليد ديلك.. واصلك لا تنفخ جضمك لا تطبز بي لسانك الحتات المطفقة في جضومك فشان يتحلقن زين... موس الجن دي اتاريها تتعوج في الجلد دة تعدمه الشعرايي
وحاتكم وكتين غسلت وشي وهبشت احناكي.. لقيتن ناعمااااااااااااااااات علي جضوم أليسا
وبقيت اشوف في وشي في المراية وحسيت اني بقيت من عُلي القوم.. وجاتني الهاشميي مع النعوميي دي وافتكرن نفسي ضومة وائل كفوري ... لا تاني قلت بشبه توم كروز ولا ديفيد بيكهام..
وقمت قلعت ((التِكِيي)) الفي ((الروب)) قلت اربط راسي مِتِلُم.. شويتين رجعت لي طبيعتي وقلت: ايي تربط شنو يا ود جبيرين وانت الشعر بقى محاذي الاضنين علي حيطة الجالوص الماها تامي ونص الراس دلجة علي مدرج الطيارات..
اها يا الحبان قمت استغفرت.. واتذكرت الامتداد.. ومعاهو موس الحلاقة الاسمها التمساح ديك والمكنة ألتها العاملي زي راس الكنش وتتفتح من لاااااافوق ديك... قعدتلي في كرسي في وسط الحمام واتذكرن وكتين اكون داير احلق في بيتنا
تجيب مكنة التمساح دي وتشوفلك قِلْميي ألت مراييي من مراية الدولابت الاتكسرت... وتجي تتكلها في بنبر جنب ماسورة الحوش وتقعد تنفخ في جضومك فشان الموس ما تجرحك وتحلق كويس.. وتلزلز بي لسانك البُكنات المطفقي من حنكك وتمشي الموس فيها ..
ولامن تنتهي تلقى وشك كله ينقط دم من حلاقة الجن دي... وركبيك يموتن كله كله من صنقير الحلاقي ام دق دي
ومن غير ما احس لقيت نفسي بقول بي صوت عالي: قادر الله علمه واسع ههههههههههه
إنا لله ياخ
لا يتوفر نص بديل تلقائي.
بواسطة : admin
 0  0  65
التعليقات ( 0 )

جديد الأخبار

أصيب 40 شخصا هم 18 شرطيا و22 مشجعا، في أحداث عنف أعقبت مباراة كرة قدم في الجزائر،..

جميع الأوقات بتوقيت جرينتش +3 ساعات. الوقت الآن هو 06:48 مساءً الخميس 15 نوفمبر 2018.