• ×

09:56 مساءً , الإثنين 25 مارس 2019

نموذج مستعمرة : النوع قائمة

نموذج مستعمرة : النوع قالب فيديو

قائمة

عشه كلمينا ميري ذكرينا

زيادة حجم الخط مسح إنقاص حجم الخط
 
عَشّه .. كلّمينا
ميرى.. ذكّرينا
كل سنكى أحسن
يبقى ..مسطرينا

نحن شعب أسطى
يلا .. جيبو مونا
نبنى .. نبنى .. نبنى
مسرحاً.. ونــــادى
مصنعــاً وبوسته
حرب لا لا لا لا
كبرى .. استبــاليه
صالــه للثقــافــه
تســرح الغزاله
جنبها ...الزرافه
ركَ قمرى طار
قيره قيره قيره
نطَط الصغار
صفّق الترولى
طمن القطار
حلقت وحلقت حمامة المطار

كلّ طلقه بينا نحن تبقى وفره
سمسما وبفره
سكراً وشاى
تترا سايكلين
جاي وجاي وجاي
مافى حاجه ساى
كلّو عندو دِين
كلّو عندو راى

بور وبورسودان
بارا والجنينه
عبرى ولاّ واو
حاجه مش كويسه
كلّ زول براو
هي سودانا بكره
من سودانا ناو

تكتب إنت تقرا
تعرف السياسه
في محل حراسه
حجرة الدراسه
تمشى إنت تلقى
فى الضلمه لمبه
ألف ضحكه حلوه .. تسندك بجنبه
بى تمن طبنجه
أحسن الكمنجه
أحلى شكل منقه .. أحسن الحليب

إيد وايد وايد
تزرع الجديد
غابة النشيد

إيد وايد وايد
ما في بينا سيد
إيد وايد وايد
نلحق البعيد

نحنه مش مرقنا
حته واحده جينا
جينا لى السرقنا
حقّنا وعصينا
دمّنا وعرقنا
ولّعوا الرتينا

عَشّه كلّمينا
ميري ذكّرينا
كلّ سنكى أحسن
يبقى مسطرينا


محجوب شريف

image
بواسطة : admin
 0  0  128
التعليقات ( 0 )

جميع الأوقات بتوقيت جرينتش +3 ساعات. الوقت الآن هو 09:56 مساءً الإثنين 25 مارس 2019.