• آخر الأخبار

    الأحد، 25 أكتوبر 2020

    خارطة الطريق - ناصر بابكر -- جددوا للتش جددوا للتش



     جددوا للتش جددوا للتش
    خارطة الطريق - ناصر بابكر 

     أنه الهلال يرفع اسماء أبو عشرين ومحمد الرشيد ورمضان عجب فجر يوم مباراة القمة في السيستم (انتظار) عشان تظهر في سيستم المريخ وأنه كل الصحف الزرقاء تطلع بالخبر كان دلالة واضحة على ٣ حاجات الأولى عدم ثقة أهل الهلال في فريقهم وأنه كل رهانهم في الفوز كان زعزعة المريخ .. التانية أنه الغرض من توقيع عقود مع اللعيبة ديل مباراة القمة والفوز بالدوري الممتاز بدليل أنهم وقعوا عقودات قبل أسابيع ولسه التسجيلات والسيستم يوم الأول من نوفمبر ومع ذلك أختار الهلال الإعلان يوم مباراة القمة يعني الغرض كان الفوز بالممتاز .. التالتة ودي الأهم، أثبتت أنه البفكروا ويخططوا لمجالس الهلال دائما وابدا بتعاملوا بي عدم أخلاق وزي ما قبل كده طاردوا أي لاعب طلع من الهلال بالاساءات والشائعات، اتعاملوا بي عدم أخلاق حتى مع لعيبة عاوزين يسجلوهم وما اظن في درجة زي دي من الغباء، ما ممكن لاعب وقع ليك تطعنوا طعنة زي دي بمحاولة تصويره كمتواطئ أو بائع .. لكن زي ما قلت قبل كده ودائما بقول المريخ عمل صالح وأي تخطيط خبيث وتافه لالحاق الضرر بيهو بتحول بحمد الله لي خير للنادي .. الحاجة العملها الهلال عشان يشل بيها تفكير اللعيبة ديل قبل القمة بقت ليهم دافع كبير جداً يضاعفوا جهدهم .. واقنعت جزء من اللعيبة ديل أنهم كانوا ح برتكبوا غلطة عمرهم لو بدلوا المريخ بالهلال لأنهم ح يمشوا لي مجتمع (ذكر الكل واراد الجزء) مجرد من الأخلاق .. وكانوا سبب في أنه مجتمع المريخ يتوحد وسوداكال وحازم يشتغلوا سوا عشان يجددوا للعيبة .. والممتاز الحمد والشكر لله فاز بيهو المريخ .. يعني درس جوة الميدان ودرس برة الميدان..

    انتهيت يا ناصر؟ لسه ما انتهيت .. طبعا احتفاء بعض الأهلة ومنهم إداريين وإعلاميين مع الأسف أنه اللعيبة الوقعوا مع الهلال ديل وجددوا مع المريخ ح يتعاقبوا وممكن يتوقفوا أو توقع عليهم غرامة بوريك أنه المجتمع ده مريض لي ياتو درجة ونجاحه الوحيد في الضر، الهلال ح يدوهو لقب الممتاز لو اتعاقبوا؟ المريخ ح يتأثر لو اتعاقبوا؟ لو مفتكرين ح يتأثر ارجعوا شوفوا المريخ ده هل لعب كورتين وراء بعض الفترة الفاتت بي تشكيلة واحدة؟ الأهم يا نادي (الحركة الوطنية) اللعيبة ديل لعيبة منتخب وطني والمنتخب عندو مباريات مهمة في تصفيات كاس العالم وأمم افريقيا، يعني همكم توقفوا لعيبة المنتخب؟ عاوزين تضروا المنتخب؟ لا عندكم لعيبة باستثناء اتنين أو تلاتة ممكن ينفعوا المنتخب ولا عاوزين اللعيبة الممكن يقدموا يلعبوا يا تطبيع إتحاد الكرة؟ دي الحاجة الجبتوهم عشانه يا شداد؟ ..
    المهم ما علينا، المريخ ده نادي كبير ويتعامل بي اخلاق وما بقيف على لاعب ، البقعد ليهو الفخر أنه بلعب في المريخ والبمشي عليهو يسهل وعلينا يمهل وده عصر احتراف وشكرا شكرا على ما قدمه للمريخ..
    بالنسبة لرمضان ومحمد الرشيد وابوعشرين، انتو غلطتوا غلطة كبيرة والله لأنه التسجيلات لسه لي شهر ١١ يبقى مافي داعي توقعوا قبل شهر منها والصاح تدوا المريخ فرصة أولوية لحدي آخر يوم قبل التسجيلات ولو ما قيمكم بعدها ليكم الحرية تمشوا .. لكن برضو أنا شخصياً بديكم العذر والله لأنه الظروف الاقتصادية بقت صعبة جدا (١) .. ولأنه الأرقام العرضها السوباط دي أرقام غريبة وبتخلع (٢) .. ولأنه سوداكال ومجلس المريخ غلطوا غلطة عمرهم خلو الملف معلق كده لحدي نهاية الموسم ونهاية العقود وده غلط كبير جداً والحمد لله عدت بأخف الأضرار وممكن بي مكسب توحد سوداكال وحازم لأول مرة..
    الناس الزعلانيين من اللعيبة، رمضان أيام مفاوضات قدالة الكلام كان عن ٤ أو ٥ الهلال عرض عليه (١٨) .. محمد الرشيد الكلام عن (٦) الهلال عرض عليه (٢٤) .. أبو عشرين عرضوا عليه (١٠) .. ودي أرقام ما ساهلة ولو ما اغرت اللاعبين ممكن تغري أسرهم ومحيطهم .. عشان كده اعذروهم وما تنسوا أنه كان في تقصير كبير جدا من مجلس ومجتمع المريخ ويا ريت ده يكون درس الناس تستفيد منهم أنه تتفق وتتحد في كل ما يتعلق بالكيان وفريق الكرة مهما اختلفت الرؤى والاراء في الجوانب الإدارية.. في النهاية الفرحة بتجمعنا كلنا والليلة ناس التطبيع فرحانين وناس الديمقراطية فرحانين وكل مجتمع المريخ مبسوط والعكس لو الناس خسرت عشان كده الناس تتفق على مبادئ وثوابت ولو ده حصل مستقبل المريخ ح يكون مشرق جداً واختلاف الرأي في الإدارة منو وكيف ح يكون لي خير وما بتضرر منه النادي.
    ارجع لي الهلال، بعد الأرقام اللي عرضتوها لي لعيبة المريخ دي ح تجددوا لي لعيبتكم بي كم؟ ولعيبة الأندية التانية وإدارة الأندية التانية ح تدفعوا ليهم كم؟ والدفع بأرقام زي دي ح يستمر كم؟ وهل نسيتوا كلامكم أيام الوالي عن دفع أرقام زي دي في بلد شعبها بيعاني؟ هل أولى قروش زي دي تدفع في الكورة ولا اولى تدفع عشان تقلل صفوف العيش أو البنزين يا نادي (الحركة الوطنية؟).. متذكرين كلامكم وكلام أئمة المساجد عن السفه؟ عموما لو مفتكرين القروش بتصنع نادي عظيم خليكم كده بتحلموا والمرتزقة يستفيدوا ويستفيدوا والمجتمع يتملي ارزقية لمن ما تقدروا تتخلصوا منهم ..
    آخر حاجة لأبطال الممتاز .. ناس الرايح جاي .. أبطال عهد المدنية .. اتعلموا من درس الغربال ودرس ناس عجب الحالي وجددوا للتش جددوا للتش جددوا للتش.
    والحمد لله على نعمة المريخ.
    ربما تحتوي الصورة على: ‏‏شخص واحد‏، ‏نص مفاده '‏المسالمة Almusalma Almu الطريق خارطة بابكر ناصر Https.almasalma.com f almasalma almasalma almasalma‏'‏‏

    • Blogger Comments
    • Facebook Comments

    0 التعليقات:

    إرسال تعليق

    مرحب بكم في مجلة الزعيم الإخبارية

    Item Reviewed: خارطة الطريق - ناصر بابكر -- جددوا للتش جددوا للتش Rating: 5 Reviewed By: الصادق الشايب الجيلي
    Scroll to Top