لمن تقرع الاجراس؟ .انت..يا مريخ..يا شرفة التاريخ حسن محمد حمد

 

لمن تقرع الاجراس؟

حسن محمد حمد

أنها فسيولوجيا الأشياء...وبس!!

■ شدوا لك ركب فوق مهرك الجماح

يا أسد الكدادة الفارس الجحجاح

السم النقوع الفي البدن نتاح

اعصار المفازة اللي العيون كتاح

عفن تحكيم ما بعيقك.. ان كتر وان راح..!!

■ وانت ..انت..يا مريخ..يا شرفة التاريخ.. تتمايل مع عاشقك المتبتل(سيد خليفة)..وهو يرتجز فيك ما لم يقله احد من العالمين في غيرك.. اوووه يا احمر السودان .. فارس ام درمان الاشم.. ها انت تعبث بالهلال طريدتك الازلية و بذاكرتي المترنحة ..وتعيدني الي مقولة سيد خليفة عندما ذهب اهله الي مصر ليعيدونه الي السودان فقال لهم.. (النيل عندي هنا..ما ناقصني الا المريخ )..!!

■ واضحك ايها السادة ..حتي ظن من معي ان ما قدمه .. المحارب الاحمر الباسل (عمار طيفور).. اطاش عقلي .. وانا اجتر خزعبلات الطاهر يونس .. الذي جهز شماعة زرقاء مهترئة (السحر والسحرة).. فعلاج السحر سهل ومتوفر ..ومجانا ايضا ..لكن اين السحر ؟؟.. فالمريخ هو نادى(القرآن).. وكل الدنيا تعرف جيدا .. من اين تندلع سحب(الدخان) الزرقاء واعترافات الساحر(المنصورى) الموثقة بقلم صديقي الازرق المتطرف(مبارك البلال) بالاولي والاخيرة بصحيفة(الدار) حااااضرة..وتهديدات نجم ومدرب واداري الهلال فوزى المرضي ..بالحريق والانطنة.. تقطع لسان كل افاك اثيم بلا رحمة .. المضحك اكثر هو ان الطاهر يونس (اكد) انهم بانفسهم قاموا (بعمل) رادع..معاكس ل(عمل)سوداكال..وان كل(الطرق مغلقة)...شفتوا كيف يفكر الهلالاب..هسي خاتيين هم علي الصفر ..ولا.. الصفر خاتي عليهم؟؟

■ لا اظن ان الطاهر بونس .. يجهل ان المريخ يرفع شعاره منذ ان دخلناه ..(بالرحمن والقرآن .. مريخنا مصان).. هذا الشعار رفعناه امس ..صبيحة اللقاء ..لاننا نعلم ما الذي ينتظر نجومنا في ملعب الهلال .. وبكفي اننا لم نحقق اي فوز في دور المجموعات الماضي ..مع عدد مريع من الاصابات فاقت اصابات ريال مدريد القياسية في 4 مباريات فقط اجبرنا علي ادائها باستاد الهلال ..!! قالوا سحر قال ..للعلم السحر عمل شيطان ..والشيطان والسحر .. والقرآن لا يلتقيان ابدا ..ويكفي ذكر الرحمن ليبطل رجس الشيطان تماما ..يا نائب رئيس نادي الهلال ..الذي حشد من السحرة في طائرته لملاقاة الوداد في ذهاب نهائي الاندية.. اكتر من عدد نجومه .. كما قال د. شداد ..ولم يعد الا بهزيمة مدوية

■ لكن ..نحن نعذرك يا يونس .. فالذي يحدث من المريخ .. سحر ..واكتر من سحر ..والله .. فريق يفتقد فريقه كله .. وبجلدكم زي دا ..(سحار امه ذاتا سحارة)والله صحي ..جبنا الغربال جلدناكم ..شلتوا الغربال (فشخناكم)..بابعشرين غسلناكم ..شلتوهو (عذبناكم).. بي العجب(هبدناكم) وقفتوا . عجب والرشيد وبخيت (ضربناكم)..بي عطا المنان (دقيناكم) ..بي شداد (فرمناكم) بي برمجة باني الفكهاني (غربلناكم)..بي تواطؤ ابوجبل (فسحناكم)..بي البرير(بربرناكم) بي اشرف(كردناكم)..بي السوباط (ثبطانكم)..اقول ليك حاجة ..يا اخي(سحر)..سحر شنو .. دا جن كلكي عدييييل ..والله ..قول ياخي .. والله لو محلك ..نقول اي شئ(اييييي شئئئئئئئ) والما عاجبو يخلي (البرهان) يستقيل ..وجد المريخ(ثقيل) و(عملتو بايخة) و(عملها ظاهرة).. (والله صحي)..!!

■لكن ..بعيدا ..عن اللخو العزيز ود يونس ..دعونا نتحدث عن القراءة الفنية للمباراة .. لكي نزيد مساحة الضحك علي عقلية نائب السوباط.. كلكم تابعتم ما ذكرناه عدة مرات في عدد من القنوات اخرها المسرح الرياضي مع العزيز ايمن حسب الرسول ..بمداخلة من الصديق الاثير د. عمر النقي.. ان الفارق بين كشف الاحمر والهلال سيبقي ضوئيا لعدة سنوات..وكلكم قرأتم ذات العبارة امس في الاجراس صحيفة (المدنية) الالكترونية..!!

■ لقد شقي رجالات المريخ في تنضيد الكشف الاحمر ..طوال عقد من الزمان ..ونجحوا في رفد الكشف بافضل المواهب .. من كل الاندية وعلي راسها .. هلال الطاهر يونس نائب السوباط..(في روحو).. ولذا يصعب جدا ..ان لم يستحيل ان يصمد الهلال ..باسلحته المعلومة (المحرمة) في الصمود امام هذه الفوارق الشاسعة ..علي المدى الزمني القريب..بحول الله تعالي!!

■كتبنا امس ما ظللنا نؤكده في الفضائيات والاذاعات الزرقاء والمحايدة ..ان الفارق ليس واحدا ..فدفاع المريخ يمثل ترسانة فولاذ ..يقودها الضكر صلاح افضل واشرس ليبرو افريقي الان ..واظنكم رايتم نمر المغارة الاسمر ..شفتو يا الطاهر يونس ولا..ما شفتو ..ساحر ولا.. ما ساحر ..؟؟

■ بجانب اديلي..(العديل).. وطبنجة..ياخي دا مدفع مكسيم.. والله..وكرنقو....هذه الترسانة مقابل..الاخوة عبدالرزاكوف .. سموال اخو الحكم وفارس وارنق..معقووووولة..؟؟ يذكر القراء تحفظي الصريح علي (منجد)..لكن المستر كلارك .. مع الشاطر جدا(يماني) استمعا الينا واشركوا(محمد مصطفي)..وكفي يا(سماعين)..ولذا كان اكتر من طبيعي ان يلعب هلال فورمسينو او(فورموست) للحول ولا نرى (طحينا)..

■ قلت لايمن ..علي الهواء .. ان المريخ لم يخسر في وجود جمال ابوعنجة حتي من الاهلي والترجي في زروة امجادهما الا بالتحكيم ..وفي وسط المريخ الان..عمار طيفور ..الفوتوكوبي الاصل من جمال ابوعنجة .. واظنكم تابعتم معنا كيف كان تاثير المحارب الفارس كيغان في كل لمسة وحركة وافتكاك من العملاق طيفور ..و وجدي ونوح ..والسماني ..بينما كان ذكاء وديناميكية الدبابة النيجيرية طوني..اثر بالغ في تكسير كل الدفاعات الزرقاء في كل طلعة ..

■ امس اثبت سيف (طيري يا طيارة)..اننا نتحدث بمعرفة اتت بالممارسة الحقيقية والصقل والدراسة لكرة القدم والحمد لله .. ونحن نؤكد ان الغربال سيفشل في الهلال ...بينما لن يفشل تيري في المريخ ..كما ان مصير ابعشرين لن يختلف عن مصير جمال سالم .. فهل خالف الواقع قرائتنا باي حال..؟؟ الحمد لله جل وعلا ..وسبحانك لا علم لنا الا ما علمتنا انك انت العليم الحكيم ..

■ ببساطة شديدة .. الغربال لاعب 30 ياردة..لا تزيد خطورته قبلها عن الصفر ..بمعني انه يحتاج لعمل الفرقة كلها قبل مساحته هذه ..بينما تيري يمتلك 80% من الحلول التي يحتاجها لهز الشباك..وقد كان ..ولولا سوء الطالع ..و(اغلاق لجنة الطاهر يونس) كان عدد اهدافه وصل نصف الدستة ..!!

آخر الاجراس

الحكم دا ..سمع بالموت والقبر؟

■ كان الكوتشينغ في المريخ ذكيا جدا ..وهو يتعامل مع مباراة يدخلها وهو مقصقص الاجنحة بفعل لجان اتحاد .. مجبر علي تسديد فاتورة اموال كردنة .. لو تقوم القيامة هسي..!!

■ النتيجة الحقيقية للمباراة 8/صفر..بخلاف ضربة الجزاء التي حلف الحكم البلاضمير ..وليد الطيب الا يحتسبها لو تم قتل سيف فيها بساطور ..وبخلاف طرد سموال اخو (زميله) الذي صفع لاعب المريخ امامه وطرد اللاعب الذي (وطأ) لاعب المريخ وهو علي الارض علي عينك يا حقير ..!!

■ ترى بعيدا ..عن قيم الرجولة .. والعدالة ..واخلاق اولاد الناس السودانيين المعروفة .. هل سمع هذا الحكم وليد ..بالموت ..و بعذاب القبر ..وان شداد وباني والطاهر يونس لن ينفعونه لو هسي بس ..جاتو كورونا ..؟؟؟

■ انتصار احمر مبهر ..يؤكد ان المريخ كسب مدربا شاطرا .. يعرف كيف يعجم عيدانه ..لكن الاهم ..انني اجد نفسي فخور جدا ..بذكاء الزميل النابه (ايمن يماني)..برافووووو ايمن .. تستاهل يا رائع..!!

■ مصطفي لعب مباراة ممتازة ابطل عدة معكوسات وخرج في توقيتات بالغة الدقة .. وانسانا هاجس جلطات المرمي .. يستحق منحه كل الفرصة المطلوبة لاكتساب الثقة الكاملة بالنفس..

■دفاع فولاذي ..تصدي لكل فساد الصافرة الوضيعة .. قبل طلعات الهلال اليائسة ..بصلابة وصبر وثبات يشبه سلالة كمال ع الغني والقوز وكاوندا والتقر..

■ الوسط كان تمساح الدميرة الذي ابتلع وسط وهجوم الهلال .. وقام (بتكسير) تكتلات وسط ودفاعات الازرق بكل سهولة كل ما احتاج لذلك ..

■ طيفور ..العملاق ..فوتوكوبي الفارس ابوعنجة ..يحفظك الله يا ولد..وكمان طوني (الدبابة) الحمراء الخطيرة ..قلت لي اخوك حكم يا السموال..؟؟

■اما ..تيري ..فهو ..هو .. فرتاق حافلن ملاي سروجن دم .. عرفت ليه يا النقي ..قلت ليك ليست ثمة مقارنة بين سيف والغربال علي الاطلاق...ولا نشرح تاني ؟

■الفوز المؤزر ..نهديه لكل فقداء القبيلة الحمراء ..ولروابط النريخ بالخليج علي دعمهم المتواتر لعشقهم الازلي ..ولبروف مهدي عيسي ولصديقي الاحمر المخلص عبدالله الشايقي ..طلمبة اللعوتة..ولصديقي خالد عباس الرياض..ولقروب (بالقرآن مريخنا مصان) الذين يحصنون المريخ من النفاثات في العقد بالقرآن .. يا ود يونس ..شفت كيف.. تعال نعلمك..اصلك نائب (السوباط ولدنا) ..!!

■ بكرة ..نواصل ..بحول الله جل وعلا

مايو 24, 2021