• آخر الأخبار

    الاثنين، 28 فبراير 2022

    كلمات ترجيح زهير عبادي السماني وطائرات (الدرون)

     



    كلمات ترجيح : زهير عبادي


    السماني وطائرات (الدرون)

    صن داونز خلاها ضلمة

    اجاجون ولا يحزنون

    قافلين على سبعة الديناري السماني جدع ليهم دو مع انو حريف


    ومباراة الجمعة تبقى في الذاكرة كثريا لا تنطفئ جذوتها للتأريخ وللاجيال القادمة لتخبر عن مريخ هو الأول في كل شئ

    أول فوز في لقاءات القمة عند البدايات وأول فوز دوري عابر للقارات

    والقارة تعرفه بزعيمها مانديلا والقاهرة تعرفه الان في السلام... وياسلام.

    كتبوا قبل المباراة بعد أن فتحوا بوابات الخيال العلمي عن آخرها أن هدف اجاجون سيكون في الدقيقة السابعة طلع لا اجاجون ولا يحزنون.

    (الجماعة قافلين على سبعة الديناري السماني جلاهم بي (دو). عند الدقيقة الثالثة.. واضح انو عندهم فرق في التوقيت.

    اقول ليكم حاجة وعارف ما حتصدقوا لكن دي الحقيقة.. أول مرة في حياتي طوال مشاهدتي لكرة القدم السودانية أشاهد هدف على طريقة هدف السماني الثاني.

    برااااحة ماتنفعلوا ساي ويااخوانا كان رقتوا بوصف الشفتو.

    طيب... اساسا تسديد وتسجيل الأهداف يتم بطريقتين اما التسديد بقوة أو عن طريق التوجيه دون استعمال القوة (ودي طبعا عندنا في السودان مافي).

    هناك طريقة ثالثة هي القوة مع التوجيه (ودي نادرة جدا يعني على مستوى العالم بعملوها تلاتة بس... عاطف القوز وروبيرتو كارلوس والهولندي كومان).

    اما التسجيل عبر التوجيه فقط على طريقة ميسي ونيمار وامبابي فدى محليا ما شفناها الا عند السماني.

    الكورة تكون مسيرة وموجهة زي طائرة (الدرون). تشوفا ماشة على الشبكة وتعاين ليها عشرين عشرين ما تعرف التحكم وين.

    المهم

    أمس صنداونز هزم الاهلي على ملعب السلام.

    ذات الملعب الذي تعادل فيه مع المريخ.

    وخلا المجموعة سمك لبن تمر هندي.

    خلاها زي صحن الفتة بتاع العذابة في اللقمة الأخيرة. مافي زول بتظارف ويخلي لقمتو لي زول. انت وضراعك. يا تاكل ولا تقعد تشتم الحكم.

    نشكر الأخوة الأهلاوية على كرم الضيافة لكن بعد ده الميدان يا حميدان.

    كل ما تبقى من مباريات هو بطولة قائمة بذاتها والهدف الثلاث نقاط

    كل الفرق الأربعة لديها حظ في الترقي حتى الهلال صاحب النقطة.

    صديقي حاتم الكوجاب كحال كل الأهلة زعلان جدا من السماني.

    قال بس يقعد السنة كلها ساي ويجي يغلب الهلال. قلت ليهو عندكم في الشمالية في حاجة اسمها (الضكر) وده بستعملوهو لتلقيح التمر (القفوزة) وده استخدامو مرة وااااحدة في السنة لكن نتايجو مبهرة شهر تسعة موسم الحصاد. هسة السماني ده اشتغل شهر اتنين فما عليكم الا الانتظار حتى شهر تسعة.

    اخيرا

    قولوا وراي عشرة مرات


    قون سيما سينما

    • Blogger Comments
    • Facebook Comments

    0 التعليقات:

    إرسال تعليق

    مرحب بكم في مجلة الزعيم الإخبارية

    Item Reviewed: كلمات ترجيح زهير عبادي السماني وطائرات (الدرون) Rating: 5 Reviewed By: الصادق الشايب الجيلي
    Scroll to Top