في السلك ـــــ بابكر سلك
وبدت حسابات اللولوة
*براي سويتها في نفسي
*عبارة تعبر عن حال المريخ بعد الجولة الرابعة
*ولو باييدي كنت طوعت الكورة يوم الأهلي
*وقبلها يوم صن داونز
*خسرنا من الأهلي وكنا الأقرب للنصر
*وتعادلنا أمام صن داونز وكنا الأجدر بالنصر
*ما أضعناه في تلك المباراتين
*هو سبب اللولوة الفيها نحن دي
*ولأول مرة تصب لولوتنا في صالح الهلال
*لو هزمنا الأهلي بإستاد السلام (ارضنا)
*حا نكون خدمنا الهلال إذا انتصر على صن داونز وعدنا نحن من جنوب أفريقيا حفايا
*لانو خفي حنين أخير من مشي الحفا
*ومشي (الحفا) أخير من مشي (العرا)
*لولوة ما كان في ليها داعي
*لكن بقت واقع
*القصة بقت صعبة لكن ما مستحيلة
*ليست مستحيلة إذا خضنا المعركة بقوة إرادة وحسن إدارة
*الحسابات على الورق تؤهل صن والأهلي
*وده إحباطنا البنزرعوا في أنفسنا ليقتل عزيمتنا ويصيبنا بالدونية
*الأهلي الكبير العريق يمر بأسوأ فتراته
*وإذا تأهل يبقى لا خيرا فينا ولا خيرا في ناس محمد عبد الماجد
*إذا عملنا بجد للتأهل وفزنا على الأهلي بأرضنا (مصر) وفزنا على صن على أرضه ببقى عندنا عشر نقاط
*وصن عندو عشر نقاط إذا خسر من الهلال
*وعشرتنا بتاكل عشرة صن بالمواجهات المباشرة
*الهلال يغلب الأهلي يعمل عشرة بعد يغلب صن اتنين صفر
*عشرة الهلال تاكل عشرة صن بأفضلية المواجهات المباشرة
*الأهلي يا الدلعادي بعد يتغلب مننا (على أرضنا) ومن الهلال
*بكون في أربعتو دي ويطير رفقة صن داونز
*شفتوا كونو نتأهل نحن والهلال بعد الحالة دي وارد كيف؟؟؟؟
*إرادة تخلق ثقة وإصرارا وحسن إدارة للمباريات المتبقية ونتأهل
*وإلا
*نقعد في دونيتنا دي ونطير
*أصلو في البلد دي يطير المريخ ويطير الهلال ويطير الدولار وسودانير ما بتطير
*لأننا كده
*كأنو ربنا خلقنا عشان نحطم البلد دي وأحلام أطفالها
*ياخ معقول؟
*ولا سيبك ياخ
*أصلو في البلد دي
*ولا مافي داعي
*لكن الحنة لو طبقوها بتبقى بااااااهته
*وتكون القصة استشهاد محلبية وجرح سرتية وضياع حنه وكسرة ضهر سااااي
*طبقوها
*طبقهم الشنو أقول عليهم
*أيها الناس
*إن تنصروا الله ينصركم
*وينجح ثورتكم
*ويكملكم بعقلكم
*أها
*نجي لي شمارات والي الخرتوم
*والينا المكلف بينا
*الناس المشوا عشان يتفقوا كان لينا أو علينا
*ما سمعوا بي ترباس بغني ما بنمشي لي ناس مابجونا؟؟؟؟
*طيب الخفة شنو؟؟؟؟؟
سلك كهربا
ننساك كيف والكلب قال مشاكل البيت بتتحلحل جوه البيت ماتدخلوا الغربا يشيلوا حالكم بعدما شالوا دهبكم ومالكم
وإلى لقاء..
0 التعليقات:
إرسال تعليق
مرحب بكم في مجلة الزعيم الإخبارية