الساخر طارق جبريل و عرس نجوى

 

المهم..

ــــــــــــــــ

عرس نجوى..

.................

الضُهرية...

الراكوبة القدام التُكل....

سكينة قاعدة في بمبر وقدامها قدح دلكة تدخل اصابعينا في كورية الموية «لونها اغباااااش» وتواسي في الدلكة في القدح... أم النصر قلبت القدح من اللدايات ودخانه لاوي وبالماشة ختت ليها جمرة في اللدايات التانية..

الرادي معلق في الشعبة وغتاية حجار البطارية مكسورة وفيه ثلاثة حجار ظهرية..

المذيع: كيف قيلتوا... موسيقى.. قنبو طولا..موسيقى.. دبايو..

بعديه طوالي:

أنــا فــي الـتـمني ديـمـه هـديلي سـاجع

مـا لـقيت لـي مـغيث ولا لـقيت لـي مـراجع

داير أشوف حبيبي اليوم داك شفته رايق ودمعه ناقع

أســود شـعـره حـالـك أمـا صـفاره فـاقع

تـتـلاصف خــدوده لا حـجـاب ولا بـراقـع

أشـوف لـعسو ونـواعسو جـل الـباري صانع

.....

سكينة مسحت العرق من رقبتها بالطرحة وكبت القهوة من الشرقرق: أم النصر أكفيها وتعالي اشربي قهوتك

أم النصر: سمح.. الضفر دايرلو نضيف كمان.. المحلب العندك كافي ولا نرسل خادم الله تزيده

سكينة: كفاية ياخ وخلي خدوم تكفي البخور في الصاج..

فاطمة جات داخلة من الباب: أيوووووووووووووووووووووووووووووووي أيوووووووووووووووووووووووووووووووي أيوووووووووووووووووووووووووووووووي أيوووووووووووووووووووووووووووووووي أيوووووووووووووووووووووووووووووووي

ردت عليها علوية: أيوووووووووووووووووووووووووووووووي أيوووووووووووووووووووووووووووووووي أيوووووووووووووووووووووووووووووووي

فاطمة: نجوى عجبني ليها بتي عاد

سكينة: ادخلي يا الفنجرية.. ادخلي حبيبة قساي

الراكوبة هاجت وماجت بالزغاريد والغناء: أيوووووووووووووووووووووووووووووووي أيوووووووووووووووووووووووووووووووي

.......

الاوضة الفاتحة في البرندة..

نجوى عاملة ليها لخوخة في وشها ورافعة فستانها لحدي نص «وركيها» ونعمات تشيل ليها في الحلوة..

نجوى: أحيييي أحيييي أحيييي أحيييي هريتيني يا نعمات..

نعمات: هريتك... انت دايرة تعرسي ساي كدة سليقة يا بت «.....»

نجوى: هههههههههههههههههههههه ياخ انا ما قايلاهو متعب كدة العرس دة

نعمات قرصتها في وركها: اصبري ما تتزحزحي لي كدة خليني انتفك سمح

علوية: هههههههههههههههههههههههههههه عاد نعمات بتوصلك للعرس تراري بت الهرمة

نجوى: انا يا ربي سويت شنو عشان ترميني في صحبات زي ديل

نعمات: ههههههههههههههههههههههههههههه عاد بعدين اتذكرين يا «.........»

..........

العصرية..

علوية قشت الحوش ورشته: يا نعمات تعالي شيلي معاي العناقريب ديل قبل «العلامة» ما تجي

سكينة: افرشوا الملايات الجداد بتلقيهم في الضلفة اللااااجوة حقت الدولاب

نعمات: سمح يا خالتي

فرشوا العناقريب وختوها نصف مستطيل وختوا كرسي لـ«العلامة» وكرسي للبت الجمبها وفرشوا البرش في النص

علوية شالت الصفيحة من بلاعة الحمام وفي خشم الباب كشحتها ورجعت دقت باب الحمام لي نجوى:

يا بت امورقي «العلامة» دي جات انت اصلك بتستحمي ولا بتنضفي في ام فتفت..

نجوى: ههههههههههههههههه مارقة تمرق روحك

علوية: روحك انت بتمرق بعد بكرة عاد هههههههههههههههههههههههههههه

دخلت «العلامة» وسخنوا ليها الدلوكة وبدت تغني عشان البنات يحفظوا معاها الاغاني الحا ترقص بيهم العروس:

نادوا لي حنان الليل..

حنانا معذبانا وساكنة الحي معانا الليل..

أموت أنا في الرميلة..

أموت أنا في الرميلة.. ويجيب خبري أبو رجيلة الليل..

أموت أنا في الكباري..

أموت أنا في الكباري ويجيب خبري كمساري الليل..

أموت أنا في البكاسي..

أموت أنا في البكاسي ويجيب خبري البقاسي الليل..

نجوى وقفت في النص وانتنت وختت يدها في وشها ونزلت يدها برااااااحة وبقت تحرك نصها اليمين مرة

ومرة نصها الشمال وادتها ترترة لحدي نهاية البرش...

قامت «العلامة» قلعت توبها وقالت ليها: يا نجوى في الأول اتني كدة ما تتعسمي ومدي «.....» لي قدام ياخي بعدين

لمن تجي للترترة حاولي ضومي اوراكك كدة... غنوا لي عشان اوريها:

نادوا لي حنان الليل..

حنانا معذبانا وساكنة الحي معانا الليل..

أموت أنا في الرميلة..

أموت أنا في الرميلة.. ويجيب خبري أبو رجيلة الليل..

الساعة «العلامة» اتنت وبقت تترتر علوية قعدت تصفر وبقت تكورك وووووووووووووووووووووب وووووووووووووووووووووب

أحي أنا يا الكمونية بالجقاجق....😀😀😀😀😀

الباقي ما بيتوصف..

إنا لله ياخ

أبريل 26, 2022