حكايتي معاك... ___________________________ تجاني عبدالسلام العوض...

 

حكايتي معاك...

___________________________

تجاني عبدالسلام العوض...

حكايتي معاك

فصول بتطول..

وصف يعجز

حداهو القول..

حقيقة ودغري

ما مجهول..

عوالم ودهشه

حاضرة ذهول..

حكايتي معاك

أحاسيس

من جيوش و خيول..

مسرجة بالأماني شتول..

مدججة بالحسام مصقول..

حشود دوزن

حماسها نحاس

نقر حاديها دق طبول..

حكايتي معاك

ترانيم عز

و منديل لون صفار مشغول..

فكر فات حد مدارك الزول..

محطات للفرح علي طول..

و حكايتي معاك

تطوووول و تطول..

حكايتي معاك

حكاية نجمة ضواية..

أنيقه مكمله و راية..

و صبحت للقلوب غاية...

و فوق نص السما مراية..

دليل للراح و هداية..

و للداير الحساب آية..

و للداير القياس تاية..

و حكايتي معاك

تطووووول و تطول..

حكايتي معاك

حسيس مترع

رهيف مسدار..

عشق فاق الخيال

ودار..

هيام مالكني ليل

و نهار..

غرام مليان حجا

و أسرار..

وداد واصل لأبعد

دار..

صبح كاسيني

لون النار..

سرح وإتعمق

الأفكار..

أسر وخلي

القليب إحتار..

و حكايتي معاك

تطوووول و تطول..

حكايتي معاك

صبابه وروح..

عنادل في

رياضها تنوح..

نغم كروان

يرد الروح..

وتر دوزن

شفيف البوح..

بلسم طبب

المجروح...

دواية و آية

في نص لوح..

نجوم غطت

مسام السوح..

حكايتي معاك

بلابل و دوح..

و حكايتي معاك

تطووووول و تطول..

حكايتي معاك

حكاية الخاتي

من اللوم..

حكايتي معاك

و إنت الخاتي

من اللوم..

يا السموك

"زعيم"

" مارد"

و سيد القوم..

يا "الأحمر"

سهم ناري

و شعارو

نجوم..

يا ساكن

ضفاف النيل

حشا الخرتوم..

يا المتربع

السودان

بتقدل في

شموخ

بتحوم..

بنفخر بيك

"مسالمة"

زمان...

و أم در

ترقصك مردوم..

كائن جوووة

في الوجدان

عقد بلمع

درر منظوم..

شامه في

جبهة الأوطان

برااااك جلب

الكؤوس معلوم..

عزيز سموكا

مريخنا

تزيد في الروعة

يوم ورا يوم..

يا الدخري

البسند الحيل

و وكت الحارة

ياكا لزوم..

مجرب وسمو

فوق

ضهر الخصوم

مرسوم..

يا الختري

الصعب كاتال

هصور لطام

دفاع و هجوم..

يا جبل الثبات

ركاز

وفوق جلل

الحديد بتعوم..

يا السم الزعاف

نقاع و كضاب البقول

مهضوم..

يا المتسيد "العرضة"

و "جارك" حد

مجافي النوم..

جرعتو الهزيمه

مرار

خسف قمرو

الصبح مأزوم..

شلعتو وعملتو

خراب

وبنعق فوق

ديارو

البوم..

و حكايتي معاك

تطووووول

و تطول..

حكايتي معاك

عشق ودار

صفار وحمار..

صبح في حلي

والتسفار..

شغل فكري

وندي الأزهار..

نثر عطرو

وشذاهو

وسار..

نفح وأزكي

البيوت

دار دار..

وإتمدد جمالو

وطار..

وحسو الزاع

ملأ الأمصار..

وحكايتي معاك

يا لون

الدهب والنار..

يا المريخ

حضور إبهار..

أنيق ماليني

حد الجوف..

قدر مد البصر

والشوف..

معاك

كل الأماني

قطوف..

معاك

أعذب غنانا

حروف..

معاك

نفرح نطييير

ونطوف..

معاك

نتصافي

بالمعروف..

معاك

نتحدي

أي ظروف..

معاك

أبدا

يزورنا الخوف..

وإنت نشنكاة

في قرنوف..

وحكايتي

معاك

تطووووول

وتطول..

حكايتي معاك

يا الطليت

صباح مشهود..

يا مريخ

جميل مريود..

معاك

حبل الوصال

ممدود..

ومعاك

بالإلفه

مافي صدود..

ومعاك

نبني ونعلي

سدود..

ومعاك أصدق

كلام موعود..

ومعاك

أروع قوافي

ردود..

ومعاك

ريحان وفل

و ورود..

ومعاك

بنصون غرامنا

عهود..

ومعاك

عشقا"

وغير

محدود..

غرق.

لا نشله

. لا حدوت..

ولسسسسع

في هواك

بنجود..

وحكايتي

معاك

تطووووول

وتطول..

وحكايتي معاك

يا الفاتن

مليح ونضار..

يا مريخ

جلالة وغنوه

للأحرار..

معاك ماضي

ومعاك حاضر

معاك تذكار..

ومعاك

نعزف

وتر ومزمار..

ومعاك

نصدح

نغني كنار..

ومعاك

طبله

ونحاسا" حار..

ومعاك

درقه

وحسام بتار..

ومعاك ثوار

معاك أحرار

ومعاك بنخوض

أتون النار..

ومعاك بنكمل

المشوار..

وحكايتي

معاك

تطووووول

وتطول..

تجاني عبدالسلام..

____________________

مايو 29, 2022