كبد الحقيقة د. مزمل أبو القاسم . ولقينا لينا (جنينة)!

 

كبد الحقيقة د. مزمل أبو القاسم

. ولقينا لينا (جنينة)!

*🟡🔴المريخ حاجة آخر (تكت).. ولقينا لينا (جنينة)!*

كالعادة يا سادة.. الزعيم المقدام يجندل المدعوم في قمة كأس السلام

استعاد نجوم الزعيم مقولة (قمصان المريخ وحدها كافية لإنزال الهزيمة بالهلال)

‏* الحمد لله حمداً كثيراً طيباً مباركاً فيه.

* الحمد لله آناء الليل وأطراف النهار.

* الحمد لله حمداً يليق بعظمته وجلاله.

* الحمد لله عدد خلقه وزنة عرشه.

* الحمد لله الذي بنعمته تتم الصالحات.

* الحمد لله الذي منّ على الزعيم بفوزه المؤزر، وأفرح الصفوة في كل مكان.

* انتصارات الزعيم على المدعوم في الولايات.. تقاليد وعادات!

* عادية ومتوقعة.. وطبيعية.

* قاعدة.. وما سواها شاذ.

* أول سحبة (جوية ولائية): جوبا مالك عليا!

* ثاني (هربة): دمازينية جوية.

* ثالث ضربة ولائية: دنقلا الأبية.

* المحصلة ضربة جوية وهرولة هلالية!

* الرابعة واقعة.

* في الجنينة.. لقينا لينا جنينة!

* الجنينة.. الهلال (بتبلا).

* الجنينة أدي الزبون تلّة!

* الجنينة نجضتي خلق الله!

* الجنينة أدي التكت طلّة.

* الجنينة يا رُطب الكنينة!

* الله لينا من رُطب الجنينة.. وكُر علينا!

* كالعادة يا سادة.. الوصيف مردوم بالزيادة.

* الزعيم منقوص ومنتصر.

* والزبون مكتمل ومنحسر.

* مع الهلال أثبت القاهر صحة المقولة القديمة (المريخ خطر.. بمن حضر).

* أمس غاب الحارس الأساسي محمد المصطفى.. وغاب النمر.. وغاب الكرشوم.. وغاب الجزولي.. وغاب توني.. وغاب المدير الفني.. وغاب معهم الوصيف!

* النتيجة: مسمار الغرب.. البِسُر القلب.

* هدف التكت في قمة السلام.. صورة بالكريون من مسمار رمضان قمة الدوري!

* نفس المرمى (كان جنوبياً هوانا)!

* نفس الصناعة ونفس الزول (تثبيتة بالصدر).

* نفس الصاروخ.

* نفس الصدّة!

* ونفس مسك الختام!

* باختصار: نفس الدواء.. بس من شركة تانية!

* الصحيح.. من دكتور تاني.

* دكتور التكت.. بتشخيص من دكتور رمضان.. أحلى الأقوان.

* الدناش.. مطر الدعاش الرشّ!

* عاش أبو هاشم.. عاش أبو هاشم.

* أبو هاشم سند العاشم!!

* تكت.. لاعبي المفضل في الزعيم.. وهذه المساحة تشهد.

* دخل الدناش تاريخ القمة من أوسع الأبواب مع أنه زار شباك الزبون من قبل.

* اقتفى أثر سيزر الذي صرع المدعوم في قمة كأس جوبا.

* التكت المبدع الممتع.

* صاحب اللمسة الجميلة والخيال الواسع.

* يصنع ويسجل.

* يلعب بطريقة السهل الممتنع.

* لن أذيع سراً إذا ذكرت أنني ظللت أتحدث معه باستمرار خلال الفترة الماضية مطالباً إياه بأن يتمتع بجرأة أكبر، ليكمل الهجمات باقتحام منطقة الجزاء مع كل الهجمات، كي يتمكن من التسجيل بانتظام.

* وعد فأوفى.

* أنجز التكت ما وعد.

* أمس وقبل دقيقتين فقط من هدف التكت كتبت في قروب (الصدى أون لاين) على الواتساب معلقاً على إقدام إبراهومة على تحويل التكت من الطرف اليمين إلى وسط الملعب وتوقعت أن ينتصر المريخ بعدها.

* كتبت: (إبراهومة حوّل التكت للوسط.. بعد ده ممكن نفوز)، وقد كان بحمد الله.

* في أقصى الغرب.. تواصل الضرب.

* أصبح انتصار المريخ على الهلال طبيعي في كل الأوقات.

* وفي كل الملاعب.

* في العاصمة والولايات وخارج السودان!

* في آخر عشر مباريات للقمة في كل المناسبات والبطولات.. انتصر المريخ على الهلال ست مرات.

* وانتصر المدعوم مرتين فقط، وانتهت مباراتان بالتعادل.

* المسامير على قفا من يشيل.

* الهلال أصبح مثل الباب القديم!

* كل يومين داقين فيهو مسمار!

* وكل فترة.. ماخد رُقعة!!

* مسمار التكت أمانة ما حار!

* شطة قبانيت.

* حبشية بنكهة دارفورية سودانية!

* أصبحت لقاءات المدعوم من أسهل المباريات بالنسبة لفرسان الزعيم.

* بأي تشكيلة.

* في أي زمان!!

* في أي مكان.

* في الفطر وفي (رمضان)!

* داخل وخارج السودان.

* الهلال مضروب بغض النظر عن المسابقة والملعب والمناسبة والتوقيت.

* برئيس.. وبدون رئيس.

* بمجلس.. وبدون مجلس.

* بمجلس واحد.. أو مجلسين!

* بمدرب أجنبي.. أو بمدرب وطني.

* داخل العاصمة أو خارجها!!

* بالعصر أو بي ضو الرتاين!!

* ده الهلال اللي عهودنا صاين!

* نحن نغلب أحسن زباين!!

* التكت يا أحسن جناح!!

* مكتملين أو ناقصين.. الأهلة مردومين!

* الحكاية دي بقت عندنا زي شراب الموية.

* نقرطعكم في أي ملف.

* نبلعكم جب.. في أي ملعب!

* وفي دار أندوكا.. برضو يا الهلال ردموكا!

* طقطقوكا.. وهزموكا.. وبشتنوكا.. وتكتكوكا ونفشوكا وطقشوكا وقشوكا ورشوكا!!

* استعاد نجوم الزعيم مقولة (إن قمصان المريخ وحدها تكفي لإنزال الهزيمة بالهلال).

* ونبشركم.. كاس السودان قريب.. وبرضو راجنكم!

* وغالبنكم.. غالبنكم.

* لقينا لينا (جنينة)!!

* بصراحة دي جنينة شايلة ما لذ وطاب.. ونهائي ما بتتفات!!

* ناكل ونتكرّع ونقش خشمنا.. وتاني ناكل ونحلّي!!

* ننوم شوية ونقوم تاني ناكل ونترّع!!

* ونتضرّع!

* وحكمة الله.. نهائي ما بنشبع!

* مباريات القمة أصبحت عندنا حاجة آخر (تكت)!!

* ظابطة ولافقة.

* لدرجة أن المريخاب باتوا يتمنون ملاقاة الزبون كل أسبوع!!

* معذورين.. بحبوا التكتكة!!

* هتافهم المحبب (عاش أبو هاشم)!

* التحية لكل من ساهم في ضم هذا النجم المبدع الموهوب للمريخ، وعلى رأسهم قطب المريخ الكبير (ابن عمي) العوام قسم السيد، والعميد شرطة صلاح صلاح حسن محجوب، وسعادة الفريق طارق عثمان الطاهر، والراحل المقيم مولانا صلاح حسن سعيد وكل مريخاب عطبرة الأبية.

* لاعب ممتع ومبدع ومنضبط ومهذب.

* قليل الحديث كثير الإنجاز.

* الكرة بين قدميه كائن قليل الحيلة.. خاضع وخانع ومطيع، يفعل ما يؤمر.

* التكت صنع هدف الجنينة وسجله!!

* روعة ما منظور مثيلها.

* مرر لرمضان أحلى الأقوان.. وانتظر جلطة أبو عشرين في المكان الصحيح.

* وعينك ما تشوف إلا المسمار.

* لقينا لينا جنينة!!

* حاجة آخر (تكت)!

* تكتكة الساعات السويسرية تقصر.

* ضربة دار أندوكا الهزيمة الثالثة للمدعوم أمام الزعيم في الموسم الحالي.

* والرابعة لابد واقعة.

* كاس السودان بي كافي (جرس)!

* انتصارات (لها إيقاع)!

* (كافي).. بريمة جديد في سماء المريخ.

* لم يتهيب التجربة وسلم الشباك بيضاء.

* انتصار مؤزر بحارس جديد (كرت كرتونة)؛ ودفاع مكون بكامله من البدلاء!

* كِسرة.. شبيه السر كاوندا وخليفة أمير دامر.

* الصبي المُر.. وضع الغربال.. في الجيب الشمال.

* مليار نجم المباراة ده مفروض يتحول من محمد عبد الرحمن لكسرة!!

* الزجاجي سوى شنو عشان يقبض مليار؟؟

* كسرة حول الغربال إلى عصيدة!!

* مرقو أباطو والنجم!!

* دققو وغربلو!!

* ساطو وعجنو!!

* عاسو وأكلو!!

* مرقو (مولاي كما خلقتني)!!

* كسرة الصبي.. وحمزة القوي.. وبخيت وسعيد علينا.

* نسونا غياب النمر والكرشوم!!

* كل مرة نحن ناقصين.. والدماعة مرشوشين!!

* لو جيناهم مكتملين.. إلا يقوموا جارين!!

* هزيمة المدعوم في الجنينة ليها (جرس).. كافي!!

* كافي ووافي.

* جرس ذاتو زي التكت.. برضو جايينا من الأمل.

* لذلك فرحنا ببقاء الأمل في الدوري الممتاز.

* ناد محترم وصاحب صولة وجولة.. وجماهيرية وهيبة.

* فريق كبير وخطير.

* الأمل زي عطبرة الحلوة.. حاجة في غاية (التكت).

* دناش.. وخرباش!!

* الكنينة يا رُطب (الجنينة)!

* أغنية الهلالاب المفضلة هذه الأيام (غلبني كِتر عليا)!

* والكنينة يا رطب الجنينة!

* كُر علينا!

* حالة تحنن الكافر!!

* أمس أبو عشرين ذاتو كان جنينة لها إيقاع!

* في أول المباراة صفّى محمد أحمد إرنق بخروج خاطئ ولكمة خطافية في الراس!

* بعده حاول تصفية وضّاح بضربة (أم دلدوم) في العنق!

* بعده أنقذه الحكم من هدف مؤكد بعد خروج خاطئ أمام رمضان.

* قبله طلع غلط وكان محظوظاً لأن الكرة اتجهت لخارج الملعب!

* بعده صنع هدف الفوز للتكت!

* آخر حاجة اتوكل علي الله واتخارج مع دخول السماني!

* أبو عشرين كلما يطلع.. يرجع فاضي!!

* كل ما يحاول يقبض الكورة.. نلقاهو متشعبط في رقبة مدافع!

* أبو عشرين ما فارز الرقبة من الكورة!

* يا ولدنا الكورة مدورة.. والرقبة مستطيلة!!

* الكورة من جلد.. والرقبة من لحم وعضم!

* جلطات أبو عشرين.. حاجة آخر تكت!

* كلما مدافع يحاول يبعد الكورة يلقى أبو عشرين ناطي في رقبتو!!

* يتردد أن إرنق أصيب بانزلاق غضروفي في العنق بسبب لبعة ولدنا أبو عشرين له!

* حاجة آخر تكت!!

* في دار السلطان بحر الدين.. هزمنا المدعوم الحزين!!

* آخر خبر: لقينا لينا جنينة!!

*👑صفوة التميز👑*

أغسطس 01, 2022