* "معنون" لرئيس المريخ القادم .. الاولو شرط آخرو نور ...!

 

*في التمنيات* 

* "معنون" لرئيس المريخ القادم .. الاولو شرط آخرو نور ...!

محمد كوراك

* اول حاجه لن ولم نسمح لاي اعلامي او اي جهة اعلامية تابعة للمريخ ولو باللفة ان تقوم بتلميع اي مترشح لرئاسة النادي في الانتخابات القادمة ...!

* من ينوي الترشح لرئاسة المريخ لازم يجينا "متلمِّع جاهز" مويه ونور "ويرقش" ذي التِرتِر" لما تضرب فيهو "كشافات" الحفلة ...!

* "الاولو شرط آخرو نور" عشان ما تبقوا رؤوساء قِدام "الفلاشات" ووقت الجد تطلعوا لينا "الشِدره بي قفاها" وتقولو نحن ما كنا عارفين وانتو ما كلمتونا من الاول , ومن الان لازم المترشّح يعرف انو المريخ دا متروس ومطقوش مشاكل لحدي إضنيهو , مشاكل داخلية ومشاكل خارجية تشيِّب الراس , وفيهو ملفات مركونة من سنين "ملفات تودي في دهيه" وتحتاج من ينفض منها الغبار مثل ملف الاستثمار الذي هو يمثل اخطر واهم الملفات الاستراتيجية والذي يحتاج "لـ جكة ابو بكر كاكي" , والشغل البيشبه دفن الليل اب كراعا بره "ما حبابو" , وتاني مرشّح من خريجي "الزنزانات" او ممنوع من دخول السودان او الخروج منه "ما يحرج نفسو ساي ويترشح" ...!

* ما دايرين مترشح من نوعية "ولد الناس الكويسيين" سيئ الذكر السيد "حازم الرووب" , لان حازم بعد ما "آتصنفر" وبعد ما اخد "وِش تلميع" وبعد الساونة اخد ليهو حمام زيت مغربي لحدي ما بقى هو والمرايه واحد واول ما قعد فوق الكرسي قال الرووب , والان اصبح يغني وحيدا ويقول "ظلموني الحابيب وقالوا ليّا انسى" ...!

* حازم من اول عصره "جاب الودك" كباهو زيت عدييييل "200000" ألف دولار بس , عبارة عن نثريات "جهجتو" ليك لما قال "وااااي" غلبني , وياريت لحدِ هنا "وإنستر" , قام عمل تسجيل صوتي "سمّع" أمة لا إله إلا الله , فضحنا وفضح نفسو , وهذه واحده من مخرجات نظربة "التسوي بـ ايدك يغلّب اجاويدك" ...!

* قبل التسجيل الصوتي كان حازم قد "إبتكر" نظرية جديدة "كرت" سماها "السقف" , مفتكر انها ستعفيهو من "الدفع" , نحن لما كلنا طلبه درسنا نظريات كتيره في مراحلنا الدراسية المختلفة وكل نظرية درسناها كانت بترتكز على أسس ثابته , إلّا نظرية السقف للعلامة "البروف حازم الرووب" لا كان عندها أسس ولا شفنا ليها مرتكزات ثابته هي نظرية "مجقلبه" وشيها من ضهره ما بتفرزوا , سقف ويييين يا عمك مع عصر الفضاء الاحترافي ...!

* بالله نظرية "حازم الرووب" مش فشلت وبس , ده طيّرت ليك حازم ذاتو , المسكين جا يكحله لما خلاها عميانه تداقس ...!

* نظرية السقف "الحازمية" فيها شبه كبير من سقف الراكوبه في الخريف "وما تشكِّر لي الراكوبة في الخريف", نظريتك يا حازم طيّرت لينا النيجيري توني وجعلت توماس باواك يحجز ويركب "التونسية" وخلت عمار طيفور "يدق جرس" , وجابت لينا محترفين من نوعية "مِد لحافك قدر كرعيك" والمعندهوش مايلزموش , دا كلو "كوم" والتونسي مروان السعيدي كوم تاني خالص لانو "والله أعلم" لم يأتي للمريخ عبر نظرية السقف بل جاء عبر نظرية تسمى "الراكوبة البلا سقف في الخريف" وهذه نظرية "منبثقه" من نظرية "السقف" الله يجازي محنك يا حازم "بتتشوبر ليه بس من الاول" ونافش لينا فيها ريشك وعامل لينا فيها "ابو جلمبو" قسما بالله انا صدقت إنو القبه تحته فكي , عليّ الطلاق "وطلاقا بعد عقد" انا افتكرتك ح تتعاقد مع "توماس توخيل" حِته واحده حتى اني جهزت ليك عمود "ما عمود مستشفى" عمود "في التمنيات" بعنوان "حازم الفات الكبار والقدرو جاب توماس بي ضحاكاتو" اما الانتدابات ياخي انا بدأت أحلم بان كريستيانو رونالدو وصل الامارات وقعد معاك واحتسى كاس من الشاي بالياسمين ووقّع العقد وركب الطيارة الجايه السودان واول ما وصل اخد لفه في سوق الجمعة وإشترى ترمس وقزقز تسالي وكتح "هينين" من فول الحاجات , وحلمت انو حازم خرج في مؤتمر صحفي وقال انو الفرنسي كيليان إمبابي على رادار المريخ , اما استاد المريخ فقد راودني حلم بانه ستتم صيانته بأيادي طاقم المهندسين الذين شيدوا استاد البيت في لوسيل القطرية الذي سيشهد المباراة الختامية لكاس العالم وقد يفوقه من حيث الجمال والكمال وفي النهاية الشغلانية طلعت أحلام "حازمية" ذي الاحلام الفي دكان "ود البصير" ...!

* نحن تاني رئيس يجينا ويقول الرووب "ما بيلفق معانا" , البيجينا لازم يدق سدرو ويكون عارف الفيها ...!

* سوداكال اصبح رئيس بالتزكية اقصد "بالتلفقه" ولما "إتعصر" عمل لينا فيها طاشي شبكة لحدي ما لقى نفسو لافي صينية وهسه بقى يغني ويقول "لا نفع دمعي السكبتو ولا شفع عندك غرامي" والمريخ ليس في حوجة "لدموع مسكوبة" ولا "شفاعة غرام" المريخ محتاج "لكنجالات" كتيره وافكار عظيمة ...!

* نحن عيبنا بنلمِّع المترشح قبل ما يبقى رئيس والحنك دا تاني معانا مابينفع , الرئيس يجب ان تلمعه افعاله لا اقواله , تاني رئيس يجينا بالديمقراطية وبعد ما "يتوهط" يمارس الديكتاتورية البغيضة "ما حبابو" ورئيس بدون فكره وبرامج ومشاريع تطويرية وخطط بعيدة ومتوسطة وقريبة المدى ومال يغطي تلك البرامج لن نرحب به , يكفي ما حدث للمريخ عندما استعان برؤوساء من نوعية بـ ناس "زعيط ومعيط"...!

* لان المريخ ليس معمل تجارب لكل من هبّ ودبّ , ونعتذر لـ مهدي الفكي ولابو العائلة وللضو حجوج وغيرهم من عظماء المريخ عن رؤوساء "نص كم" جاءوا بعدهم هم اقل قامة من ان يديروا روضة اطفال في قرية سودانية نائية ...!

* آخر سطر .. مريخ بكره يحتاج لـ فكرة ...!

أكتوبر 28, 2022