الملعب ده يا دحية ( لا ) تتحسر عليو ولا تبكي على الأطلال ..

 *بالدارجي الفصيح من أجل المريخ* 

( 20 من 500 ) 

_____________

السيد كمال دحية يستلم مهامه كمدير للإستاد .. ويتأسف لحال الملعب والمنشآت .. ده الخبر ..

التعليق .. 

إستاد المريخ ده الحاجة الوحيدة الصدق فيها سوداكال لمن قال في واحدة من بياناتو ( لازم إستاد جديد ) .. ( وفكاها ) حامضة في واحدة من مكناتو 

وقال ( أنا جاهز للبناء ) ..

ملعب المريخ ده محتاج ( وقفة ).. عشان ما تجيب ( العيد ) يا دحية ..

إستاد المريخ ده لو ( قلبتو ) الهوبة .. وجاكم أوردغان ذات نفسو خليو ( هجينو ) .. ما بنفع فيو ( اللتيق ) و ( الرقييع ) الحاصل فيو ده ..

ومستحيل يحصل المجموعات .. ورهاني ده أتحدى بيه كل عشمان وحالم مع إحترامي ليهم ..

أمبارح قُلنا لي أب جيبين عندك جيبين …

( فريق ) يمتعك 

و ( ملعب ) يعجبك .. 

فريق كورة بجيب الجمهور .. 

وجمهور بجي الملعب ( وبشيلك ) ..

بس الشُغل ده ما ساهل ..

 وإجازة الملعب من الكاف من سابع المستحيلات .. ما بنكسِر في الهِمم .. ولا ناس تشاؤم .. 

عليه .. 

لو كُنت المسؤول .. كان وقفت أي شُغل في الملعب .. يعني ما عشان نجيب الجمهور في المجموعات نشتغل شُغل خمج يلعبنا 3 مباريات وبعدها نرجع لي نُقطة ( الهلال ) ونبدأ من جديد ونكون ضيعنا جهد ومال ..

يخوانا .. بنحتاج الملعب ما قلنا لا .. ومشتاقين لكرنفالات الفرح وليالي رقصات الهياج 

بس نحتاج لفريق كورة يهز الأرض .. وبدون الفريق لو بقيناو ملعبنا كامب نو … فائدة No .. 

وجهة نظر .. 

الملعب ده يا دحية ( لا ) تتحسر عليو ولا تبكي على الأطلال .. 

عاوز تشتغل إشتغل بدون ( جكمنة ) و ( جوباك ) .. وما توعد وعود ما بتقدر توفي بيها ..

وصلت بالملعب المجوعات خير وبركتين .. ما لِعبنا فيو .. نلعب في ( السوبر ) يا اب جيبين 

وده ( مربط فرسنا ) ورهانا ..

المرحلة إستثنائية .. وما محتاجا زيادة ضغط .. 

وزول بالين كضاب يا ( أب جيبين ) ..

أقرع الفريق .. وزِحنا من الغريق .. 

عاوزين كورة ما مقصورة 

وتيمنا ده كان نططنا بودينا المطمورة 

هجمة تسلسل : 

التيشرتاب حيقولو حازم زاتو قال كورة ما مقصورة 

أسكتو عشان ما نصفق ليكم صفقة ( الصفيقين ) الطبالين ..  

اللهم قد بلغت .

أب هجمة ✍️

#للحول

أكتوبر 31, 2022