.jpg)
إنجاز هاتريك الممتاز
زيت الكلام : حسن رضوان
- الحمد لله، الحمد لله، الحمد لله.
- نحمد الله عدد خلقه على جميع نعمه وخصوصاً نعمة المريخ.
- تصور كيف يكون الحال لو ما كنت مريخابي.
- نبارك لجمهور الصفوة رفع الهلال وضمه في قائمة ضحايا المريخ للمرة الثانية هذا الموسم. رايح جاي.
- بعد إنجاز دوري الثورة الممتاز ٢٠١٩، يحقق المريخ دوري الكورونا، دوري حمدوك، دوري التطبيع، سموه بأي مسمى المهم التالتة ثابتة وداخل الديار الحمراء.
- دائماً ما يعشق المريخ نحت إسمه مع المناسبات.
- ألم نقل لكم بأننا سنركب الكركابة.
- كيف لي أن أقنع أحد بأن آخر مرة أحرز فيها الهلال بطولة الممتاز كان سعر الدولار في السوق الموازي يعادل ٢٤ جنية واليوم ٢٨٠ ج؟
- وآخر من رفع كاس الممتاز للهلال هو المدرب الشاب بشة.
- كان بإمكان لاعبو المريخ مضاعفة النتيجة في أكثر من مناسبة، ولكنهم اكتفوا بالمسمار.
- حقق الهلال ريمونتادا تاريخية ونجح في العودة إلى (العرضة شمال) بعد نهاية المباراة بمسمار السماني.
- المثل بقول الثالثة ثابته، وسيما ماقصر جاب مسمار قلووظ وثبتها.
- بنات الأصول مابحبوا غير أزواجهم، طول عمركم ناس أصول.
- أبشر ياعريس.
- المسمار حااااااار نار.
- ليه أي قمة "صامتة" وبدون جمهور بتنتهي بمسمار؟! ما ونس.
- رضخ سيما لطلب جمهور الصفوة ولم يحرز الثاني بعد هتافهم له في المران الختامي ب" هوي يا السماني عليك الله ماتجيب التاني عليك الله".
- السؤال البطرح نفسه هل كان الهلال موجوداً في مباراة اليوم؟
- حضرنا ولم نجدكم.
- ويييييين روفا و ويييييييين أطهر سموحة؟
- سيما يحرز هدف سيما.
- هدف بالكربون لهدفه في أبطال افريقيا، مرة في سالم ومرة مكسيم.
- ابتداءً من الغد حنخلف رجل على رجل ونستمتع ببكاء الإعلام الهلالي والتخدير الممنهج لجماهيرهم الصابرة و المكلومة ٣ مواسم على التوالي.
- التخدير طبعاً بالحقنة الكبييييرة بتاعة التسجيلات على شاكلة: مهاجم معروف ينشط في الدوري الاوروبي في طريقه للهلال. والهلال يكمل اتفاقه مع ٤ لاعبين كبار في المريخ. السوباط يفجر مفاجأة التسجيلات.
- طبعاً الرشيد لازم يكون خالف تذكر ويكتب " ده ما الهلال ده لعب عيال".
- وحنقعد بمزاج عالي ونستمتع بكتباتهم عن أزمات العيش والبنزين والغاز والتطبيع و الرفع.
- و من ماتجيب ليهم سيرة الكورة، كلهم طبعاً حيدوك نفس الإجابات النموذجية " ياخ عليك الله كورة شنو؟ انت في شنو والناس في شنو؟ الناس مالاقيه تاكل".
- طوالي تعرف إنه مسمار سيما القلووظ حاااااار.
- في واحد ثقيل بعد نهاية الكورة بقى يهتف يلا على الرابع يلا على الرابع.
- الوصيف القلبي رادو.
- وصيف دنيانا.
- زيت الزيت: كاسين ممتاز في النفس الشهر؟! والله الواحد بالطريقة حيجيهو إحتقان في الإحتفالات.
.jpeg)
0 التعليقات:
إرسال تعليق
مرحب بكم في مجلة الزعيم الإخبارية