كبد الحقيقة...د. مزمل أبو القاسم
سيما.. طاسو وتبَّاشي!
* ما زالت آثار ضربة سيما الأليمة ظاهرة على أحبابنا الهلالاب.
* الوجع بائن، والدموع تتطاقش.. والهضربة مستمرة.
* المعلومات المتوفرة لدينا تشير إلى أن غرفة تسجيلات الوصيف تجاهلت كل الاحترازات الصحية للكورونا، بعد ضربة قمة الكورونا.
* فيها زحام شديد، وإهمال واضح لمبدأ (التباعد الاجتماعي)!
* ضمت الغرفة حتى اللحظة 23 لاعباً، ومرشحة لاستقبال المزيد!
* بالطريقة دي لعيبتكم بلحقوا آل المهدي!
* وضربة الكورونا ستعقب ضربة السماني!
* على العموم نحن كصفوة وأبطال دوري تلاتة مرات على التوالي مشغولين بالهلال، وشايلين همه!
* لازم نتدخل لإنعاشه، كما فعلنا في أربعينيات القرن الماضي بأشهر عملية نقل دم في تاريخ الكرة السودانية، عندما ضعف الهلال وتراجع وتهلهل حتى كاد يهبط ويتلاشى، فاختار لاعب المريخ طلعت فريد أن ينتقل إليه، بمعية مجموعة من لاعبي المريخ، كي يمنعوا الهلال من الاندثار!
* الهلال نفسه خرج من ضلع المريخ أول مرة بأشهر زعلة في تاريخ الرياضة السودانية.
* عندما اختار المريخاب الأوائل أن يحولوا اسم ناديهم من المسالمة إلى المريخ، في العام 1927، غضب بعض أبناء النادي، تعصباً منهم لاسم الحي، ورفضوا التغيير، واستقالوا من المريخ بقيادة فتح الله بشارة، وأقدموا على تكوين الهلال في العام 1930!
* من ديك والزعل شابك فيهم!
* الزعلة المبارية الصِفر!
* حالياً ظروف الهلال تشبه الظروف التي عاشها في الأربعينيات!
* فريق تعبان.. كحيان.. مهلهل.. لاحق أمات طه.. منزوع الدسم وقليل الحيلة!
* لا فرق بينهم وبين بقية (هلالات) الممتاز.. هو وهلال كادوقلي وهلال الفاشر وهلال نيالا في السوء سواء.
* بالطبع لم نذكر معهم هلال الأبيض لأنه أفضل منهم.
* عندما حضر الصربي زوران مانولوفيتش مدرب الهلال الجديد مباراة هلال السماني وهلال الفاشر في الدوري الحالي (انتهت بالتعادل) سأل من حولهم بما معناه (هلالنا ياتو فيهم)؟
* لم يستطع أن يميز بينهما، لتقارب المستوى، بل إن هلال الفاشر كان أفضل.
* عشان كدة لازم نحن كمريخاب نقيف مع المدعوم، وندعمو.. قبل نفقدو!
* الفريق الدرَّن تلاتة مرات متتالية قبل ما ياخد علي راسو من الزعيم ممكن عادي يتدحرج ويهبط من الممتاز، وبدل ينضرب من سيما والمريخ، حا يتغلب من حيدوب النهود وسبدو الضعين والنيل حلفا والمتمة شندي ومريخ نيالا والنهضة ربك في الدوري الوسيط!
* الأهلة أنفسهم حاسين بالخطر، وعارفين تميز لاعبي المريخ، عشان كدة مجتهدين في تسجيلهم!
* نحن برضو زيهم حاسين بالخطر علي المدعوم، وخايفين نفقد أبو الهل، وما نلقى النرشو!
* عشان كدة لازم ولابد نقيف معاهو ونسندو.. ونقترح على الصفوة أن يستغنوا عن فائض عمالتهم، ويقدموا فريقاً كاملاً من احتياطيي الزعيم كي يلعب باسم الوصيف الدائم وينقذه من الهبوط في الموسم المقبل!
* الحارس محمد المصطفى، ورباعي الدفاع المكون من رامي كورتكيلا وجدو كومر وحمزة داؤود وطبنجة، وفي الوسط نديهم وجدي هندسة ووليد الليبي ومصعب كردمان، وفي الهجوم ندعمهم بريشموند أنطوي وسفيان وسيف الدمازين!
* وبذلك نضمن المحافظة على وصيف دنيانا معانا في الممتاز!
* بغير ذلك ستعضون بنان الندم على المدعوم يا صفوة!
* سيهبط، وحينها لات ساعة مندم!
* لن يجدي البكاء على اللبن المسكوب، والوصيف المضروب!
* نحن بصراحة ما عندنا أي استعداد نستغنى عن حبيبنا أبو الهل!
* لازم يكون معانا، وطوالي قاعد ورانا!
* يا وصيف عمري الما دمت حي!
* هناك من يطالبون بإعارة التكت للمدعوم!
* نقول لهؤلاء، بصراحة كدة عصرتوا علينا شديد!
* أبو هاشم لاعبي المفضل في فرقة الموهوبين!
* مش حا اتنازل عنو أبداً مهما يكون!
* حتى لو الهلال يهبط، أبو هاشم لازم يقعد!
* إذا تعذر علينا أن نرفع الهلال بالاحتياطيين سنستعين بالمعلم طاسو، ورفيق دربه تبَّاشي، كي يرفعوه معنا!
* لمن لا يعرفون المعلم طاسو فهو أشهر عازف أورغ، يعمل مع القونات!
* وفي حفلاته الصاخبة يرفع شفاتة جنوب الحزام العجلات والمواتر والثلاجات والغسالات والعناقريب والسراير وكل ما يمكن حمله في وسط الدايرة، تعبيراً عن الطرب والنشوة!
* مرة استبدو بهم الطرب فرفعوا عربية (بيكانتو)!
* الرفعوا البيكانتو ديل ما بغلبهم يرفعوا الوصيف الدائم!
* معاً لإنقاذ أبو الهل من المصير المظلم بمساعدة تباشي وطاسو يا صفوة!
* تباشي نار الضلِع.
* وطاسو نار وشرار.. زي السماني بالضبط!!
* إذا تعثرت المساعدة فقد نضطر إلى الاستعانة بعشة الجبلية، لتحميس شفاتة جنوب الحزام بأغنية (إنت ساكن الكونيكا)، كي يطربوا أكثر وتمكنوا من مساعدتنا على رفع مستوى الهلال المنهار!
آخر الحقائق
* إذا لم يتحمس الشفاتة بأغنية (ساكن الكونيكا) سنطلب من عشة الجبلية أن تغني لهم (ريدك يا شبه القمر.. فيروس في دمي انتشر)!
* أجمل ما في الأمر أنها تردد كلمة (حماااااام) بعد أن تغني المقطع المذكور!
* الجبلية ذاتها عارفاكم حمام ميت!
* وقد يتطب منها الأمر ترديد أغنية (منو القال حنكي حبَّة.. وأنا من دونك واقفة صبَّة)!
* وسنهدي أغنية (نحن بنخلي الناس تحكي عننا.. البوبار ده ما حقنا) للصفوة!
* وسنطلب من مروة الدولية أن تغني للوصيفاب أغنية (إنت براك بديت العذاب.. كبير وعايش دور الشباب)!
* وتغني بلسان المريخاب: (أنا أسست أنجزت.. ما زيك كبرت وجلست)!
* وقد نستعين بالمطرب علي كايرو ليغني لهم من ألحان كرنقو وكايرو (البنلقاهو كلو بنضايرو)!
* (جيبوا لي التش.. جهجه الإستاد.. من مواهب التش أفقدوا الأولاد.. نادوا لي سيما يقرأ لي أوراد).
* (كلموا الحكام.. التش ده ما برا.. جيبوا لي علاج.. نادوا لي فقرا.. سووا لي بخرة.. السحر في الملعب.. وفي دمانا سرا.. خلوا اللعيبة تجن.. واللعيبة جارية ورا)!
* (الأولياء الصٌلاح سووا لي حجاب.. جيبوا لي علاج.. بي محاية شراب.. عقلي من التش.. الليلة طشَّ وغاب.. مهارته في الميدان.. عذبتنا عذاب)!
* (من قذايف التش.. حيل حراسنا انهدَّ.. كترت الأهداف وغابت الصدّة.. جيبوا لي التش.. طالت المُدة.. سووا لي رُقية.. كان أضوق غمدة)!
* قذيفة برضو سيما طيرت النوم من عيون الوصايفة يا كابو.
* للمساعدة على رفع اسم الوصيف الدائم من قائمة الفرق الأكثر تدهوراً والأقل نمواً سنصرح له بإشراك ولدنا جمال سالم وولدنا أبو عشرين كحارسين للمرمى في أول مباراة للقمة!
* يلعبوا بي قون واحد ياخدوا واحد!
* يلعبوا بي قونين، ياخدوا قونين!
* الوصايفة راغبين في تسجيل رمضان وأبو عشرين ومحمد الرشيد ومحمد عبد الرحمن ويحلمون بالتش!
* دفعوا المليارات لاقتناء الكنوز المريخية.
* ندعوهم لأن يتحولوا إلى تشجيع الزعيم للاستمتاع بالمجان!
* وفروا المال والتعب والفريق الكعب.
* لسنا الأوحد لكننا الأفضل.
* تعال يا وصيفابي ومعك آخرون.
* الزعيم سيد البلد الأوحد!
* وفي المدعوم الهموم بالكوم.
* جيبوا لي التش.. جيبوا لي سيما.. المريخ زعيم، والهلال حكايتو أليمة!
* آخر خبر: إدمان الفضية.. أخطر قضية!
مزمل أبو القاسم
.jpg)
0 التعليقات:
إرسال تعليق
مرحب بكم في مجلة الزعيم الإخبارية