شاطيء الريفيرا
محمد عمر الأمين
جائزة موقع خبرك خبرها عجيب!
* في حاجات كده بتحصل لا بتفهم هل هي مجاملة ام تكبير اكوم أو حتى ترضيات.
* زمان ونحنا صغار لمن أبوي يكون مبسوط من واحد فينا بقوم يديه هدية وعشان الباقيين ما يزعلو يقوم برضو يديهم هدايا حتي وإن كانت أقل قيمة من هدية الزول المبسوط منه.
* من قمنا وعرفنا جوائز كرة القدم بنلقاها في أفضل حارس وأفضل مدافع وأفضل لاعب وسط وأفضل مهاجم.
* بالنسبة للحارس غالبا ما يكون الدخلو في شباكه أقل عدد من الأهداف وممكن برضو ينافسه حارس أخر نال أكثر عددية من الصدات لأنه الحارس الدخل في شباكة أقل عدد عادي ممكن يكون بسبب قوة دفاعه.
* أما أفضل مهاجم فدائما بتكون للمهاجم هداف الدوري أو المنافسة فهنا المهاجم عادي ممكن يصعد منصة التكريم مرتين مرة عشان جائزة الهداف ومرة عشان هو أفضل مهاجم.
* أما أفضل لاعب وسط فدي ما صعبة لأنه الحكم فيها بكون بصناعة الأهداف وربما تسجيلها وحتى مساهماته في مساعدة أخوانه في حالة الدفاع.
* بس بالجد حيرتني حكاية الجائزة الاتوزعت بين أفضل لاعب وسط ونجم الموسم فالاثنين خانتهم وسط وكان نفسي أعرف كيف بتاع نجم الموسم ما بقي أفضل لاعب وسط وأفضل لاعب وسط ما بقى نجم الموسم ليه.
* محمد حامد التش لاعب المريخ نجم بذكرني بناس سكسك وفايز نصرالدين وهيثم السعودي وكل نجوم الامتاع والابداع حد الإشباع في كرة القدم.
* وكذا الحال بالنسبة لعبدالرؤوف لاعب الهلال لاعب عنده لمسات متفردة وفنان وهداف ونحلة في خط الوسط.
* التش وروفا الإثنين نجوم وسط خلف المهاجمين والاثنين مرات كثيرة بتلقاهم في خانة الجناح والاثنين بمتازو بالتمرير القاتل يعني صناع لعب.
* بس يا ناس موقع خبر كدي اخبرونا كيف قررتم يكون واحد نجم الموسم والثاني أفضل لاعب وسط؟.
* معلوم في كل دول العالم سواء المتقدمة أو الضعيفة زينا لمن يصل الاحتكام بين إثنين في نفس الخانة والمهام هناك معايير للفصل بينهما فأكيد هناك واحد أفضل من الثاني إن شاء الله بفارق باص واحد قاتل.
* عن نفسي كنت أتمنى أن ينال أحدهم أفضل لاعب وسط وبنفس القدر يستحق اللاعب نفسه نجومية الموسم ونتمنى للآخر حظ سعيد في الموسم الجديد ويعتبر وصيف لزميله في الترشيح لهذه الجوائز.
* يعني يا التش هو أفضل لاعب وسط ونجم الموسم أو روفا وفي النهاية مافي زول بقول ام بغم لأنه الإثنين نجوم وبستاهلو وتاثيرهم مع ناديهم واضح للعيان.
* لكن بطريقتكم دي الحكاية بقت زي ترضية أبوي لينا زمان عاوز يكرم فينا واحد قام كرم الثاني عشان يعمل موازنة في عدم الزعل ومد القدوم.
سندة شاطئية
* فرحة مستحقة لجماهير المريخ بفوز التش ومثلها لجماهير الهلال بفوز عبدالرؤوف لأن النجمين قدما الممتع والمقنع لانديتهم.
* بس هناك فرحة ما مفهومة هل هي تأكيد لنجاح التسجيلات ام صلبطة ساكت زي فرحة ناس الهلال بإختيار أبو عشرين كأفضل حارس وفرحة ناس المريخ بإختيار تمبش الأمل كأفضل مدافع وسيف الدمازين مريخ الفاشر كهداف.
* أبو عشرين نال الجائزة بعرق فنيلته مع المريخ وتمبش بعرق الأمل وسيف الدمازين بعرق مريخ الفاشر.
* يعني مفروض يفرحو ناس الأمل ومريخ الفاشر أما بالنسبة للمريخ فأكيد لن يفرح لحارسه لأنه إنتقل للند.
* عموما نشكر موقع خبرك الذي كرم هؤلاء النجوم وكم كنت أتمنى أن يلتفت لبقية الأندية فهناك نجوما يستحقون مثل هذا التكريم.
* إرضاء الهلال والمريخ ممكن وجائز بحكم أنهما أصحاب الجماهيرية والإعلام بشتى أنواعه بس هناك أندية في أمس الحوجة لتحفيز نجومها لأجل الارتقاء باللعبة.
* واحد قال لي الخبر شنو؟ قلت ليه شن خبرك انت؟ قال لي موقع خبرك كرم نجوم الموسم.
* قلت ليه بتذكر فازورة هديك القرود شايلات قدورن جا القرد الكبير خت قدره وسط قدور القردة خاتيات القرود الختن قدورن ولا خاتي القرد الكبير الخت قدره وسط قدور القردة...تقدر تقول كده خمسة مرات سريع؟ قال لي ما بقدر ..قلت ليه خلاس دي جائزة أفضل لاعب ونجم الموسم ذاتها.
* جمعة مباركة عليكم.
.jpg)
0 التعليقات:
إرسال تعليق
مرحب بكم في مجلة الزعيم الإخبارية