• آخر الأخبار

    الأربعاء، 18 نوفمبر 2020

    مبادرة الخير من ناس طيبة لناس محتاجة




    مبادرة الخير من ناس طيبة لناس محتاجة .

    عمل الخير هو من الأخلاق الحميدة فعندما يفعل الإنسان الخير فإنّه يأخذ الثواب والأجر من الله تعالى في الدنيا والآخرة، ويكفيه من ذلك حب الآخرين وكسبه احترامهم له، وفي هذا المقال سنقدم مبادرة جميلة لعمل الخير من الاخ محمد الطيب الأمين

    مساء سعيد ..

    أفضل أخش في الموضوع طوالي .
    عندي مبادرة أطلقت عليها إسم (قديمك جديدنا) .
    أسعى من خلال هذا الشعار على جمع (مليون قطعة ملابس) .
    المبادرة تستهدف (الملابس القديمة والمُشرطة) .
    عندك (قميص) أنت شايف إنو ما نافع وقاعد تمسح بيهو (جزمتك) ، أدينا ليهو وح يكون (جديد) بالنسبة لزول محتاج .
    عندك بنطلون ما فيهو (سُستة ومُشروط محل الركبة) جيبو لينا نحن عندنا (السُستة) وعندنا (الإبرة والخيط) .
    عندك جلابية ما فيها (زراير) و(لاصق) فيها (زفت) أو(بوهية) جيبا ونحن بنخليها (جديدة ومكوية) .
    عِندك (توب ، بلوزة ، اسكيرت) كلو معانا تمام .
    عراقي شُراب سيوتر طاقية بينفع .
    (شال ، بطانية ، جزمة) .
    ملابس أطفال، نساء ورجال .
    جرسلين فازلين .
    أي قطعة ملابس عندك ما ليها قيمة نحن عندنا القدرة نخليها (شِبه جديدة) .
    أصلو ما تقول القميص ده منتهي أو البنطلون ده تعبان .
    أتذكر في زول بيقضي فصل الشتاء كلو ببنطلون (قماش) وفانلة كورة بتاعت برشلونة أو ريال مدريد .
    أتذكر في أطفال في أطراف الخرطوم والولايات الواحد منهم في البرد بيتغطى بجسم أبوهو وأمو .
    أنا اقسم بالله شفت ناس لما يجي البرد بجيبوا شوال الخيش بفتحوهو على نصين وبتغطوا بيهو .
    أدينا ملابسك القديمة الما عندها قيمة وح تلقاها قدام نور في قبرك وحسنة في ميزانك .
    لو قدرت غسلت ملابسك الجايبها لينا (كتر خيرك) ولو ما لقيت زمن جيبا لينا وسخانة ونحن عندنا زمن للمكوة والغسيل إن شاء الله .
    وعشان ما تكسل وتقول المواصلات لو ما قادر تجي نحن بنجيك .
    معاي مجموعة عظيمة من الشباب والشابات ح ننفذ العمل ده مع بعض وح نوزع حتى في الولايات .
    لو داير تجينا بتلقانا في الخرطوم المقرن صحيفة (المواكب) غرب الحديقة النباتية ، أو الخرطوم شمال مستشفى الزيتونة صحيفة (قوون) .
    ما بنقبل قروش .
    ما بنقبل قروش .. لا تحويل رصيد ولا كاش .
    ملابس بس .
    عندنا أرقام تلفونات للتنسيق وكده .
    ما عندك ملابس قديمة وداير تشتغل معانا حبابك ألف.
    طرحت هذه المبادرة نهار أمس بالإذاعة وقد كان التفاعل فوق الخيال وجاتنا كمية خيالية من الملابس في أقل من (٢٤) ساعة .
    أنا على ثقة (المليون قطعة دي) ح نجمعها في أقل من أسبوع وح نوزعها لحوالي (٢٥٠) ألف محتاج ومحتاجة بواقع أكثر من قطعة للشخص الواحد .
    أرقام تلفونات الشباب :
    أم تي إن : ٠٩٩٣٨٧٥٨٣٠
    زين : ٠٩١١٣١٤٣٣٣ .
    زين : ٠٩٠٠٣٠٠٩٧٩
    زين : ٠٩١٢٤٩١٦٩٧ .
    سوداني : ٠١١٥٧٧١٣٥٥
    تحياتي .. محمد الطيب الأمين


    • Blogger Comments
    • Facebook Comments

    0 التعليقات:

    إرسال تعليق

    Item Reviewed: مبادرة الخير من ناس طيبة لناس محتاجة Rating: 5 Reviewed By: الصادق الشايب الجيلي
    Scroll to Top