* في التمنيات *
معتصم محمود يكتب : عنتر قتله أعمى ...!
محمد كوراك يرد : عنتر حبيب عبله ...!
معتصم قال : سيطر الهلال على )63 %( من زمن مباراة القمة مقابل )37%( لوصيفه الدائم.
كوراك يرد : وحسبوا ليك الاستحواذ بي كم نقطة في روليت المجموعة انصحك تراجع مباراة بايرميونخ وتشلسي "يمكن تخجل من كلامك وخدودك تتورد , ثم ثانيا الزعيم وصيف دائم كيف وبأي منطق تتحدث اذا كان في آخر اربعة مواسم المريخ حقق البطولة ثلاثة مرات "تواليا" ...!
معتصم يقول : ظلت المباراة بين دفاع المريخ و هجوم الهلال الذي نال )8( ركنيات مقابل اثنتين للمريخ .
كوراك يرد : الهلال لما تاخر بهدفين من الطبيعي يكثف هجماته ومن الطبيعي المريخ يدافع عن تقدمه لان البطولة نقاط ...!
معتصم يقول : اختار الخبراء حارس المريخ كأفضل لاعب من الفرقة الحمراء بما يؤكد الهجوم الأزرق الكاسح .
كوراك يرد : علي اساس ان المريخ يحرس مرماه ادوارد ميندي والخبراء بتاعنك ديل ما اختاروا السماني الصاوي "نجما ثانيا للمباراة" او احتمال الخبراء ما شاهدوا السماني بيلعب ويمكن خبرائك ديل يكونوا ما عارفين المباراة انتهت كم ...!
معتصم يقول : رغم كل تلك الأرقام فاز الفريق الأضعف !!
كوراك يرد : اذا كان المريخ هو الفريق الاضعف بحسب كلامك يبقى فريقك اضعف من المريخ لان السماني سقاكم كاس المر مرتين , طيب لما اتهزمت من صنداونز برضو كان هو الفريق الاضعف "منطق هتيفه" ...!
يا عصومي المعلومة الجايه ده تكون فايته عليك : أمام صنداونز والاهلي مجتمعين اهتزت شباك الهلال بهدف وحيد وأمام المريخ اهتزت شباك أبو عشرين بهدفين وفي شوط واحد ومن لاعب واحد وما مهاجم صريح كمان وهذا يوضح ان دفاعاتك وفريقك باكمله راقد شوربه ...!
معتصم يقول : نعم لا تفسير فني للمباراة غير انها من الصدف التي لا تتكرّر كثيراً ...!
كوراك يرد : يعني المريخ هزم الهلال في دور مجموعات الابطال بالصدفة , وهذه لها تفسيرات عديده منها انك جاهل وغبي وضال ومضلل وبتكتب اي كلام في البطيخ وبتستعمى وتجهل المشجع الازرق البيجي يشتري الصحيفة عشان يقرأ ليك انا ما داير امشي ليك بعيد اكيد بتتذكر المباراة التي جمعت طرفي القمة في احدى مجموعات الابطال وانتهت بهدفي محمد عبدالرحمن الغربال بهدف في الشوط الاول والهدف الثاني في الشوط الثاني وحارسكم كان مكسيم اودجو يبقى كيف هزيمتكم في ملعب السلام كانت محض صدفه "كنت اظنك اكثر مهنية" ...!
معتصم يقول : مدرب لجأ للخندقة ودافع بثمانية لاعبين تاسعهم الحارس وهو محق في ذلك كونه يعرف قدرات فريقه المتواضع.
كوراك يرد : ما بتعرف تكتب وهذه واضحه لكن كمان ما بتعرف تحلل ومع انو كلامك ما صحيح لكن بقول ليك مثل هذه المباريات تلعب على جزئيات والمريخ متقدم ولازم يحافظ على تقدمه ولو المريخ فريق متواضع يبقى كيف يبصم على مرماك بالدبل ...!
معتصم يقول : المريخ الذي شهدناه تائهاً أمام صن دوانز ما كان له ان يصمد أمام الهلال الا بمثل هذه الخطة الجبانة.
كوراك يرد : المريخ كان تائها امام صنداونز "وتائه ده كلامك ام كلام الخبراء الذين تستشهد بهم" وانت تقصد صنداونز الهزم الهلال وهزم الاهلي ولم يستطيع هزبمة المريخ ...!
معتصم يقول : دفاع المنطقة الكامل اسلوب الأندية الصغيرة امام الكبيرة .
كوراك يرد : يعني هلالك كبير والمريخ فريق صغير طيب صفركم دا ليه موهط من 91 عام وليه الهلال ما يعتمد خطة الخندقة امام الاندية الكبيرة طالما انها خطة ناجحه ويكسر بيها عقدة الصفر "القعد ما قام" ...!
معتصم يقول : المريخ لعب امام الهلال بذات الخطة التي لعب بها امام بايرن ميونخ .
كوراك يرد : لان الهلال وبايرن ميونخ اندية كبيرة "سبحان الله" هذا المعتصم وضع الهلال في كفه واحده مع بايرن ميونخ "الصنف دا بتلقاه وين" في السوق مافي ...!
معتصم يقول : المحزن ان أهداف الوصيف احرزها اللاعب الذي كان في غرفة الهلال و تم ابعاده بقرار فني و من يومها و اللاعب غاضب من الهلال.
كوراك يرد : طبعا كلام معتصم دا خطأ ولا اساس له من الصحة يعني انت "الموجعك شنو بالضبط" انكم رفضتوه ام ان من يتولى عملية التسجيل في الهلال لا يفقه شيئا بعدين ما عيب يكون في غرفة تسجيلات الهلال ولم يتم ضمه للفريق هذا الموقف حدث للبرنس هيثم ومعاه حمد كمال الاتنين كانوا في غرفة تسجيلات المريخ والمريخ رفض تسجيلهم وليهو حق هيثم يصفكم باعلام "الفول"...!
معتصم يقول : زملاء السماني في هلال التبلدي و من قبله نادي توتي يعرفون انه هلالي اكثر من الصحاف لكنه فشل في تحقيق حلم حياته بارتداء الشعار الأزرق رغم جهود وسيطه كوارتي.
كوراك يرد : عشان كدا جندلكم بحبتين عند اللزوم عشان الهلال رفض يحقق ليهو رغبته ومجموع اهدافه في مرمى الهلال بلغت خمسه "وخمسة وخميسه" ...!
معتصم يقول : لو أحرز أهداف المريخ عجب او التش او غيرهما من أصحاب المواهب لما حزنا لكن السماني الذي يركض في الميدان بلا هدف!! دا الوجع ذاتو.
كوراك يرد : العجب الذي ذهب للهلال وسجل ليكم وقبض ونكص العهد وقضيته بالفيفا لم تحسم حتى الان , واحلى حاجه جملة "دا الوجع ذاتو" ...!
معتصم يقول : ذهب السماني للدوري الليبي وتم الاستغناء عنه من اول موسم فعاد للمريخ لكن تم تجاهله ولم ينل المبلغ الذي يريد ولم يقنع المدربين.
كوراك يرد : كلام الطيره المثلك الفي الباقير الوراني انت عارف هو مشى ليبيا ورجع عشان يألمكم ويزيد انينكم وهل انت يا عصومي اطلعت على العقد الليبي ومن الاخر يعني السماني لاعب اي كلام "بحسب فهمك" وانو اهدافه في شهر العسل بمصر موجعاك طيب قولك شنو في اهدافه التلاته التي كانت قبل هدفي شهر العسل ...!
معتصم يقول : منذ عودته من ليبيا ظل السماني خارج القائمة الأساسية و إن دخلها ففي الدكة.
كوراك يرد : واليوم البيدخل فيهو التشكيلة الاساسية يسبب ليكم الوجع والالم ...!
معتصم يقول : لا تفسير لهدفي السماني غير أن مقسم الأرزاق أراد له رزقاً بالمريخ وسبباً لعدم الشطب.
كوراك يرد : سبحان الله مقسم الارزاق رزق السماني بهدفين في ابوعشرين وسبحان الله الذي جعلك صحفي ...!
معتصم يقول : عنتر قتله أعمى والهلال هزمه المريخ .
كوراك يرد : يعني عنتر هو انتم والمريخ هو الاعمى ...!
الاعمى دا فجخك بي هدفين في شوط واحد يبقى الاعمى منو ...!
هو بس طوالي الاعمى دا يقتل في عنتركم
هو "عنتركم دا يا عصومي"" انت متأكد انو مفتح وما عميان وما داقس وما مداقس ...!
عنتركم دا يا عصومي اظنه قالب علي معيز بلدية ...!
كان كدا يا "عصومي" انتو "عبله" ما محصلين ...!
معتصم يقول : من حق الوصيفاب الفرح ولكن الى حين.
الغضب الساطع آت.
كوراك يرد : عمري ما سمعت بغضب ساطع عموما انصحك بزيارة عيادة الدكتور علي بلدو ولربما تكون مريض بمرض نفسي او تكون ولا بلاش "إستغفر الله" ...!
معتصم محمود دا مش كان مطرود من رحمة الكاردينال وفضل عليه فاطمة الصادق يبقى كردنه اكتشف انك اقل قامة من "فاطمة كيسو فاضي" واقل من الرشيد علي "فرن" عشان كدا تركك تحت الشمس "وانت عارف انا قاصد شنو" تلميحا لا تصريحا ...!
وانصحك نصيحه من اخ لاخيه ان تتحول للكتابة في اي مجال اخر من مجالات الصحافة عدا الكتابة في الرياضة لانك ما فاهم فيها ود النوم ...!
خليك يا عصومي مثل "استاذك" عبد الرحمن مختار "ممكون وصابر" قال "ما علينا الا الصبر" الراجل دا صابر على الهلال 91 سنه فات ايوب غادي في الصبر ...!
اما بقية "اعلام الفول" فقد فقدوا البوصلة ومنهم
المعلق سوار الدهب الذي حاول جاهدا ان يمكيج الصفر بالكلام ولكن كان يفضحه واقع الحال ...!
قسم خالد او "قسوم" الراجل دا جنه وفقد المحنه" قال في الهلال "عشقناك قبل ان نعشق بطولاتك" رحم الله حواء الطقطاقه هذا حب من طرف واحد "ياتو بطولات يا قسوم" انت منتظر بطولة بعد 91 عام طيب عشاق الاهلي المصري "المليان بطولات" يقولوا شنو في الاهلي صاحب ال 23 بطولة افريقية حقيقة "العقل زينة" ...!
كبير يا زعيم كبير يا مريخ بتعرف تجرح وتداوي كيف ...!
*آخر سطر .. عبلة تناديني والحديد لا يقاويني ...!
.jpg)
0 التعليقات:
إرسال تعليق
مرحب بكم في مجلة الزعيم الإخبارية