في السلك بابكر سلك السراميك في بيت الجالوص

 

في السلك 

  بابكر سلك

  السراميك في بيت الجالوص 

*لاصوت يعلو فوق صوت تأهيل استادنا 

*والسؤال الذي يطرح نفسو 

*هل يحتاج الاستاد لإعادة تأهيل ام لاعادة تشييد؟؟؟

*الحتة دي دايره اجابه بمنتهي الشفافية 

*هذه الاجابة يجب ان تستصحب معها طبيعة التربة ونوع الارض التي يقوم عليها الاستاد 

*ويجب ان نستصحب ايضا ماهو الصالح من منشآت الاستاد الحالي وماهو الطالح 

*لانو الحتة دي بتخلينا نبعد عن قصة السراميك في بيت الجالوص 

*يا اما علاج علمي جذري 

*يابلاش 

*واري انه غير المقصورة والكشافات لايوجد شي صالح

*هذه الارض لنا 

*ونحن نعلم طبيعتها منذ نعومة اظافرنا 

*تعلم المشي فيها 

*وعاصرنها ومعاصرنها حتي وصلت(صلعنا)الجانب الآخر من رؤوسنا 

*ارض تحتاج لجهد جد جد 

*لامستحيل 

*كلو شي ممكن يبقي علي اصوله 

*كردنة كب خرسانة صاح 

*عشان كدة زرعو ماشي 

*اما نحن فلسة مصرين علي غرس الشتلات المزهرة للشوفونية 

*وبعد اخذ الصور 

*تموت الزهرات وتتبعها الشتلات لطبيعة الارض الغير خافية علي احد 

*يبقي الحل ليس في البل 

*لان المشكلة هي البل 

*طبيعة الارض انها مبلولة 

*يبقي الحل في وقف البل 

*وعزل الاستاد كووولو عن الارض المعيبة التي تجاوره 

*تم التشييد بالمواصفات المطلوبة علميا وعمليا 

*خلاف كدة 

*كلو تلاتة سنين حانزبل 

*ويتشقق السراميك المرصوص في بيت الجالوص كعادته 

*سراميك بقوم برااا

*المهم 

*ظهرت مجموعات افريقيا 

*الكل كان يترقبها 

*الا انا 

*فما يهمني هو المريخ فقط 

*وبالشايفو في المريخ ده 

*تجدني مقتنعا باننا كان وقعنا في مجموعة برانا لن نصعد 

*الخلاف سلبنا جل قوتنا 

*والبطولات الخنفشارية باعت القضية 

*والجو غير صحي لاحلام الصعود والتأهل 

*ناهيك عن التأهل نفسو 

*لم يصل المريخ لهذه الدرجه الا بايدي(اهلو)

*فكم بصيرة ام حمد تعتقد انها حكيمة 

*وكم حمد لبد عندما اشتد الفشل 

*وكم موقف تغير 

*فالمع والضد ليست بقناعة ولكنها بأشياء تانية حامياني وحامية المريخ من الاستقرار 

*اضحي المريخ مثل الركشة 

*البنط كلو بسوق 

*ويجد من يشيد به ولو قلب الركشة في خور 

*ممكن يحتفلوا بيهو ويغنوا 

*قلبا قلبا قلبا 

*عادي جدا يبقي الفشل مصدر اعجاب طالما كان الانتماء للشخوص الفاشلة لا للكيان الكبير 

*ولكنها شدة وتزول 

https://m.facebook.com/story.php?story_fbid=pfbid022KHzrQng2pNyW73tRyfmhu2JjNXLnFtWHAypUsguRKztcGD9H36DbGjUW3eDXb8hl&id=100063848164313&mibextid=Nif5oz

*ايها الناس

*ان تنصروا الله ينصركم 

*اها 

*نجي لي شمارات والي الخرتوم

*تعرف يا والينا 

*زمااان علي المك قال لينا 

*هل اوصف شوارع الخرطوم بحبيبات الزلط المنثورة فوق التراب الكتير 

*ام بالتراب الكتير المتناثرة عليهو حبيبات الزلط؟

شمارات الكلب 

ننساك كيف والكلب قال ود الزلط كان صلح الزلط لو بقي والي....شوارع عدمت الوالي

والي لقاء 

سلك

المريخ 1908

ديسمبر 14, 2022